¿JAMÜSÜ CHOʼUJAAKA? Palajatka Corinto shia soʼutku tü 14 karaloʼuta nüshakat Pablo süpüla nütütüleʼerüin naaʼin na nuwalayuukana. Anasü maʼin ashajaa karaloʼuta süka waneeküin tü wanüikinjatkat otta müshiʼiya na aashajeʼerakana shia, eesü süpüla naashajeʼerüin shia kojuyatua. Anasü maʼin aküjaa pütchi sükajee washajüin suluʼu karaloʼuta namüin na wapüshikana, na weʼraajakana otta na nnojoliikana wapüla nepialuʼu waküjawaipa pütchi. Eesü kapüleere wamüin waashajaain wachikuaʼa nümaa wanee wayuu kamalainka amüin tü pütchikat, na kepiakana suluʼu edificio aaʼinmajünaka sutuma wijilante, kojuyasü miichi aaʼinmajünaka jee shiale wanee mma wattaka. ¿Kasa jülüjainjatka waaʼin washajapa wanee karaloʼuta sümüin wayuu nnojotka weʼraajüin?

ANUU SUKUWAʼIPAINJATKA

• Püshajapa tü karaloʼutakat, müinjatü pünüiki maʼaka püküjakai aaʼin pütchi nümüin wanee wayuu. Püküja nümüin jaralin pia otta kasapülajatüin tü püshajakat. Süchikijee tia, eeshi süpüla püsakirüin nia sünain wanee kasa kamalainjeetka nümüin jee püküja nümüin süchiki jw.org. Püküja nümüin eein wayuu ekirajaakana namaa na wawalayuukana suluʼupünaa Internet (nnojoyülia tia suluʼu wayuunaiki) jee shiale pümüin nümüin eein süpüla nikirajünüin nipialuʼu otta püküja nümüin sünülia wanee ekirajaaya sünainka tü karaloʼuta wekirajakalü aka wayuu. Puluwataapa nümüin tü karaloʼutakat, puluwataʼaleʼeya tü tarüjeeta süpülajatkat jw.org, wanee ounejaaya jee shiale wanee karaloʼutachon.

• Nnojo wainmain pünüiki. Wainmale pünüiki, akulajaajeerü naaʼin sünain aashajeʼeraa (pünaʼla jamüinjatüin süshajia wanee karaloʼuta).

• Pünaʼlaa anale süshajia tü pütchikat, mapüleere aashajeʼeraa, kamaneere pia suluʼu pünüiki, aneerüle saaʼin wayuu sutuma otta kojutule wayuu putuma. Jülüjeesü paaʼin jeʼrain achekajünaka saaʼu puluwataain tü karaloʼutakat.