Weʼrüle shiyaakua wanee kasa ponusü waaʼin, wayaawata aaʼu tü ekirajüneekalü anain waya otta nnojotsü motuin waaʼin shia. Mapuʼusü sukuwaʼipa nutuma Jeʼwaa, chi Shikiishikai tü Ekirajawaakat. Naaʼinrapuʼuin tia nikirajapa sünain wanee kasa (Gé 15:5; Jer 18:1-6). Müsia neʼe nutuma Jesuʼuya, chi Atüjakai maʼin Ekirajaa (Mt 18:2-6; 22:19-21). Maaʼutpünaa yaa, shia anaka maʼin sümüin wayuu anajaa tü videokalüirua. Anashii wekirajüle na wekirajüinkana süka tü videokalüirua, ¿eesia paainjain tia?

Eeitpa wamaʼana 10 video maaʼulu yaa süpüla wekirajüin waneʼewai sukua tü ekirajaaya suluʼukat tü poyeetokot Pütchi anasü nutuma Maleiwa. Soʼutku sünülia tü videokalüirua, müsia aka saaʼin tü asakiraa yuuikat süshajia suluʼu tü poyeetokot. Poyeetokot tüü, suluʼusü Internet jee süküjain wamüin joujainjatüin wekirajüin süka tü videokalüirua. Saʼaka tü wekirajüinjatkalü aka wayuu, eesü waneirua video weeʼiyatajatka namüin na wekirajakana wekirajapa naya sünain wanee karaloʼuta.

Kapüleere nümüin chi pikirajüinkai niyaawatüin saaʼu tü nikirajaakalü anain otta niʼrüle müliaa, püchajaa wanee video akalinjeechika nia, tia suluʼusü jw.org® otta JW Broadcasting®. Eesü süpüla pünajüin shia nümaa otta pikirajaain sünain nümaa.

Akumajünawaisü kashiwai kojuyasü video jekennuu. Süchikijee piʼrajüin shia, jülüjainjatü paaʼin jamüinjatüin sukuwaʼipa putuma süpüla pikirajüin wayuu süka.