Nütüja aaʼu Jesuu sülüʼülüin nükalia süpüla nuʼutunüin aaʼin, nukumajüinjeseʼe sukuwaʼipa tü ekawaakat shikiira Pascua süpüla niʼitaainjatüin sukuwaʼipa tü ekawaa aipaʼajatkat. Nuluwataain Pedro otta Juan süpüla nekettaajüinjatüin wanee paaʼu süpüla tia (Lu 22:7-13; piirakaa sümüin tü ayaakuaa sünainkat süta tü karaloʼutakat). Maʼaka naaʼinrüin shia Jesuu, anashii yapajüle waya süpüla tü Outkajawaakat eere Sotuin Waaʼin Outuin Jesuu, aainjünajatka maatsoʼu 27. Eeshii naneeküinnapale na wawalayuukana jaralinjachin ekirajüin soʼu kaʼikat tia, chi aainjainjachikai tü pankat, jamüinjatüin sukuwaʼipa wiinokot otta waneirua kasa. Anapejeʼe jülüjale waaʼin waneʼewai wakua kasainjatüin waaʼinrüin sümaʼinruʼu waʼatapüin süntüin tia kaʼikat.

Yapa watuma tü waaʼinkat. Suluʼu tü karaloʼutakat Pikirajaa waneepia sünain tü Nüchikimaajatkat Maleiwa, eʼitaanüsü tü wetsiikulo aashajeʼennajatkat soʼunnaa tü kaʼi sotokalü oʼu waaʼin outuin Jesuu. Anasü waashajeʼerüle shia sümaa jülüjain maʼin shia waaʼin otta eesü sooʼomüin pütchi eeka süpüla waashajeʼerüin suluʼu apéndice B12-A otta B12-B, suluʼujee la Biblia Traducción del Nuevo Mundo otta suluʼu tü Wekirajaayainjatü sünain tü outkajawaakat ojuʼitaka aaʼuriiroʼu 2020. Pütüjaweere aaʼu sümaa püpüshi süchiki jamüin kojutuinjatka maʼin wamüin naapajiraain nikii Jesuu waaʼu, puusüteerü anain sooʼomüin pütchi suluʼu Índice de las Publicaciones Watch Tower otta suluʼu Nachajaayainjatü pütchi na aküjaliikana pütchi nüchiki Jeʼwaa.

Wounejaa na wayuukana sünain. Wachajaa maʼin sukuwaʼipa süpüla wounejaain na wayuukana sünain tü Outkajawaakat eere Sotuin Waaʼin Outuin Jesuu. ¿Jaralii na eekana süpüla wounejaain sünain? Na wayuu kamalainkana amüin aapajaa tü püküjakat nüchiki Maleiwa, na wekirajapuʼukana sünain tü Wiwüliakat, na wapüshikana otta na wayuu weʼraajakana. Nachajaainjatü sukuwaʼipa na laülaashiikana süpüla nounejaain sünain tia outkajawaakat na wawalayuu ooʼulaakana suulia aʼyatawaa nümüin Jeʼwaa. Wattale nipia wanee wayuu, wachajaa suluʼu jw.org otta waküja nümüin jalainjatüin otta jalapüshinjatüin saainjünüin tü outkajawaakat pejepünaa sünain nipia. Püneeka eere WACHIKI sümüin otta süchikijee, eere «tü Outkajawaakat eere Sotuin Waaʼin Outuin Jesuu» sümüin.

¿Kasa maa eeka süpüla paaʼinrüin?