Niyamülüin David Goliat süka niʼitaain naaʼin nünain Jehová (1Sa 17:45). Nükaalinjeein Jehová napüshuaʼa na aʼyataashiikana nümüin süka pülashaatain maʼin nia (2Cr 16:9). ¿Kasa waaʼinrajatka süpüla niainjachin Jehová weʼitaain anain waaʼin suulialeʼeya weʼitaain waaʼin sünain tü kasa watüjaakalü apüleerua? Wekirajaa sünain apünüinsü kasa waaʼinrajatka.

• Oʼuraajüinjana maʼin waya. Nnojoluinjana oʼuraajüin neʼe waya süpüla motuinjatüin naaʼin Jehová waainjala, achuntajana waya nümüin süpüla wachecherüinjatüin waaʼin suulia waaʼinrüin wanee kasa mojusü (Mt 6:12, 13). Nnojoluinjana neʼe waya achuntuin nümüin Jehová anainjatüin wakuwaʼipa sünain wanee kasa waneekaka, shia anaka aluʼu wachuntule maʼin kekiiwaa nümüin süpülapünaa waneeküin wanee kasa süpüla niainjachin oʼunirüin wakuwaʼipa (Snt 1:5).

• Waashajeʼerüinjatü tü Bibliakat weinshi otta ekirajaainjana waya sünain. (Sl 1:2) Jülüja paaʼin nakuwaʼipa na aʼyataapuʼukana nümüin Maleiwa saashin tü Bibliakat jee püshata nakuwaʼipa (Snt 1:23-25). Yapa putuma tü pünüikinjatka süpüla aküjaa pütchi jaʼitashi pütüjain maʼin. Atüjeena maʼin waya yapale watuma tü ekirajaanüinjatkat sünain tü outkajawaakat.

• Jüüjüüinjana waya sümüin tü nupueulosekat Jehová. Jülüja maʼin waaʼin tü saaʼinrakat tü nupueulosekat Jehová jee woonoo sümaa (Nú 9:17). Jüüjüü waya namüin na laülaashiikana jee woonoo sümaa tü namakat wamüin (Heb 13:17).

SÜCHIKIJEE JÜNAJÜIN TÜ VIDEOKOT ¡NNOJO WEIMMOLOJOOIN AAʼIN!, JUSOUTA SHIʼIPAJEE TÜÜ:

• ¿Kasa tü kapüleekat maʼin namüin na wawalayuukana?

• ¿Kasa naaʼinraka süpüla nnojoluin neimmolojooin?