Maaʼulu yaa akooʼomüinraasü maʼin tü müliaa shiʼrakat wayuu sutuma sukutkujaain mma, süsetüin wüin otta eein wawai. Anainjatü maʼin sukuwaʼipa natuma na wawalayuukana tü naaʼinrajatkat süpüla nakaalinjain sülatüle tia. Müsüjeseʼe naküjain na Laülaashii Jülüjakana Aaʼin na Aküjaliikana pütchi sümüin tü Weteet sainküinpünaakat mma süpüla sukumajünüin Departamento de Labores de Socorro.

Eejaʼalaa sümüle wanee kasa suluʼu wanee mma, na wawalayuu aʼyataakana suluʼu Departamento de Labores de Socorro nasakirüin na laülaashiikana süchiirua tü kasa choʼujaakat namüin na wawalayuukana. Kapüleere namüin na wawalayuu kepiakana suluʼu tia mmakat nanoutuin tü kasa amojujaakat, süneekeena Weteet waneinnua wawalayuu süpüla jülüjain naaʼin tü aainjünüinjatkat. Naya aneekünakana, nasakirüinjana na laülaashiikana eere wawalayuu akaalinjeekana. Eesü süpüla nachuntuin otta nayaʼlajüin waneirua kasa choʼujaaka süpüla neitajüin shia.

Nnojoliire naneekünüin waneinnua wawalayuu sünain aaʼinraa tia, eesüjaʼa süpüla saainjüneerüin waneirua aʼyatawaa nnojotka choʼujaain, maʼweena na wawalayuukana sünain tü naaʼinrakat, akataajüneerü wainma nneerü otta eesü süpüla amülain tü kasa ayaʼlajünakat.

Na wawalayuu aneekünakana sutuma Weteet, eesüjaʼa süpüla naküjain jeʼrainjatüin tü nneerü akataajünakat otta jeʼrainjanain na wawalayuu akaalinjakana. Eeshiijaʼa naashajaale namaa na sülaülashiikana mma, jama eein süpüla nakaalinjain naya. Nnojoluinjatü paaʼinrüin tüü nnojorüle suchuntunuin pümüin: nnojo puchuntuin nneerü süpüla puluwataain eere sülatüin wanee kasa, nnojo puluwataain kasa otta nnojo puʼunuin chamüin.

¿Shiache aküjüneeka achiki nnojoliin süpüla wakaalinjain na wawalayuu aikana wapüla? Nnojo, nnojotsü shiain tia (Heb 13:16). Anuu waneirua kasa eeka süpüla waaʼinrüin napüleerua: eeshii süpüla wachuntuin naaʼu nümüin Jehová otta naaʼu na wawalayuu akaalinjakana naya otta eeshii süpüla wasülajüin nneerü süpüla saaʼinnajatüin tü aʼyatawaakat nümüin Jehová sainküin mmakat. Na oʼunirakana sukuwaʼipa tü aʼyatawaa aainjünakat suluʼu Weteet eeka sainküinpünaa mmakat, naya na Laülaashii Jülüjakana Aaʼin na Aküjaliikana pütchi. Anasü sukuwaʼipa tü nneetkat sutuma Weteet süka sütüjaain saaʼu jalain choʼujaain shia otta kasain ayaʼlajünüinjatüin. Woʼuneere sünain akaalinjaa, wepiraja tü karaloʼutakat Solicitud de voluntario local de diseño y construcción (DC-50).

SÜCHIKIJEE JÜNAJÜIN TÜ VIDEOKOT MÜLIASÜ MAʼIN WAYUU SUTUMA SÜSETÜIN WÜIN CHAA BRASIL, JUSOUTA SHIʼIPAJEE TÜÜ:

¿Kasa ponoko paaʼin sünainjee tü naaʼinrakat na aküjaliikana pütchi nüchiki Jehová napüleerua na wawalayuu epirajaakana epia sutuma wüin chaa Brasil?