Sümaʼinruʼu sülüʼülaain sükalia süpüla sajaʼttajatüin tü kasakat süpüshuaʼa, kooʼomüinjeerü maʼin tü kasa mojusükat (2Ti 3:1; Mt 24:8). Aküjünawaisü wamüin sutuma nupueulose Jeʼwaa tü waaʼinrajatkat eejaʼalaa sümüle wanee kasa mojusü maʼaka sukutkujaale tü mmakat, eere wanee wawai jee süsetüle wüin. Jaa wamüle sümüin tü münakat wamüin maaʼulu, yapeena waya otta katchinjeerü wanoula sülatapa tia kasa mojusükat otta eesü süpüla katüin woʼu sünainjee tia (Lu 16:10).

• Wakatchinreʼera wanoula. Waashajeʼerawalinjatü weinshi tü Bibliakat otta ekirajaainjana waya sünain. Wachajaa sukuwaʼipa süpüla waküjain pütchi namüin na wayuukana sümaa naatain sukuwaʼipa watuma. Nnojo piimolojooin aaʼin nnojoire süpüla namaain pia na wawalayuukana soʼu jeʼra kaʼi (Is 30:15). Soto paaʼin eein Jeʼwaa otta Jesuu waneepia pümaa (od-S 175, 176 püt. 15-17).

• Yapa putuma waneirua kasa. Eeinjatü pümaʼana wanee maletín sümaa waneirua kasa choʼujaajeetka pümüin. Sümaʼaleʼeya tia, anasü pünaajaale wainma eküülü, wüin otta epinasee makatüinjachire pia kakalia kaʼi sümaa püpüshi pipialuʼu (Pr 22:3; g17.5-S 4,  6).

SÜCHIKIJEE JÜNAJÜIN TÜ VIDEOKOT TÜ WAAʼINRAJATKAT SÜPÜLA YAPAIN WAYA SUKUTKUJAAPA MMA JEE SÜSETAPA WÜIN, JUSOUTA SHIʼIPAJEE TÜÜ:

• ¿Kasa waaʼinrajatka süpüla wakatchinrüin wanoula sukutkujaapa tü mmakat jee süsetapa wüin?

• ¿Jamüsü anaka...

  • ... waküjale namüin na laülaashiikana sunuumerose waserulaatse jee waneirua kasa?

  • ... keraale watuma tü choʼujaajeetkat wamüin sukutkujaale mma jee süsetüle wüin?

  • ... yootule waya jee watüjale saaʼu tü waaʼinrajatkat süsetüle wüin jee sukutkujaale mma?

• Müliale na waneinnua sutuma eejaʼalaa sümüin wanee kasa mojusü, ¿jarat tü apünüinsükat kasa eeka süpüla waaʼinrüin süpüla wakaalinjain naya?

PÜSAKIRA PAAʼIN: «Sutuma tü ayuuliikat COVID-19, ¿jamüsü tatüjaaka saaʼu anain yapale taya sülataʼalaa sümüle wanee kasa?».