Sutuma waleʼeruʼuin tü kaainjalaakat, wachecherüinjatü waaʼin suulia waaʼinrüin tü suchuntaakat maʼin waaʼin. Müleka waaʼinrüle tü suchuntaakat maʼin waaʼin, eeshii süpüla wooʼulaain suulia aleewa nümaa Jehová. Eeshii wayuu kojutukana maʼin amüin eeinjatüin namaʼana nepia, eküülü jee müsia tü nasheʼinjatkat suulialeʼeya alin Maleiwa napüla. Eeshii na amaʼüjiraakana nakuwaʼipa sümaa nnojoluin jamajatüin namüin tü nümakat Jehová süchiki tia (Ro 1:26, 27). Eeshii wayuu aaʼinrakana tü namakat na waneinnua süka napüleeruaanüin maʼin aaʼin, naaʼinrüin tia süpüla anajiraainjanain naya namaa (Éx 23:2).

¿Jamüsü süpüla wachecherüin waaʼin suulia tü kasa suchuntaakat maʼin waaʼin? Anasü wachajaale maʼin sukuwaʼipa süpüla waaʼinmaain maʼin tü kasa sünainpünaakat aʼyatawaa nümüin Maleiwa (Mt 4:4). Eeshii süpüla wachuntuin nümüin Jehová nükaalinjain waya süpüla wachecherüin waaʼin suulia tü kasa mojusü suchuntaakat waaʼin. ¿Jamüsüche waaʼinrüinjatka tia? Süka nütüjain saaʼu Jehová tü anakat süpüla waaʼinrüin otta jamüinjatüin sukuwaʼipa watuma (Sl 145:16).

SÜCHIKIJEE JÜNAJÜIN TÜ VIDEOKOT PAAʼINMAJIRAA PUKUWAʼIPA SUULIA TÜ AKAMÜJAAKAT, JUSOUTA SHIʼIPAJEE TÜÜ:

• ¿Jamüshii nakamüjaaka waneinnua wayuu?

• ¿Jameerü wakuwaʼipa wakamüjüle?

• ¿Jamüsü mojuka wakamüjüle jee waaʼinrüle tü kanüliakat vapear? (2Co 7:1).

• ¿Kasa paaʼinrüinjatka süpüla piyoutuin otta puuʼulaain suulia akamüjaa?