Sülüʼülapa sükalia süpüla sajaʼttüin tü kasa mojusükat, akooʼomüinraajeerü maʼin tü kasachikikat otta tü mojulawaakat (Alat 6:4). ¿Kasa waaʼinrüinjatka süpüla yapain waya sülatüle tia eere kepiain waya?

• Pükatchinra punoula. Katchinjeerü punoula nünain Jehová jee sünain tü nupueulosekat, jülüjale paaʼin tü pütchi wayaawataka anainjee tü anakat noʼuluʼu Jehová jee pikirajaale sünain nakuwaʼipa na aʼyataapuʼukana nümüin Jehová. Paaʼinrüle tia mapüleejeerü pümüin nnojoluin sünainpünaain pia poliitika jee kasachiki (Pr 12:5; jr-S 125, 126 püt. 23, 24). Shia anaka maʼin maaʼulu paʼaleewajaale maʼin namaa na wawalayuu outkajaakana pümaa (1Pe 4:7, 8).

• Yapa putuma waneirua kasa. Pünaajaa eküülü süka eein süpüla kapüleein pümüin ojuʼitaa pipialuʼujee. Jülüja paaʼin jalainjachin pia oʼunuin müleka sülatalaʼa sümüle wanee kasa. Yapa putuma tü maletin choʼujaajeetka pümüin. Eesü süpüla piʼitaain nneerü jee waneirua kasa suluʼu. Eeinjatü wamaʼana sunuumerose naserulaatse na laülaashiikana jee waapüinjatü namüin sunuumerose waserulaatse (Is 32:2; g17.5-S 3-7).

Soʼunnaa tü kasachikikat, nnojo puuʼulaain suulia paaʼinrüin tü sünainpünaakat aʼwaajaa Maleiwa (Flp 1:10). Anashi jimatüle pia eere pia, eeshijaʼa süpüla pujuʼitüin choʼujaale maʼin shia (Mt 10:16). Püsülaja süpüshi tü kasa eekat pümaʼana (Ro 12:13).

SÜCHIKIJEE JÜNAJÜIN TÜ VIDEOKOT ¿YAPASHICHE EERA PIA EEJAʼALAA SÜMÜLE WANEE KASA?, JUSOUTA SHIʼIPAJEE TÜÜ:

• ¿Jamüsü süpüla nükaalinjain waya Jehová sülatalaʼa sümüle wanee kasa?

• ¿Kasa waaʼinrüinjatka süpüla yapain waya?

• ¿Kasa waaʼinrüinjatka süpüla wakaalinjain na waneinnua?