Wanee kasa anaka maʼin naainjaka Jeʼwaa süpüla kamaneejiraain waya namaa na wawalayuukana jee waaʼinrüin tü anasükat, shia eein nutuma tü outkajawaa süpülajatkat aküjaa pütchi (Heb 10:24, 25). Nnojotsü kamaʼainjatüin tia outkajawaakat. 5 jee shiale 7 minuuto süpüla naküjain jaralüin naküjainjanaka amaa pütchi na wawalayuukana, naküjain jalainjanain naya aküjain pütchi jee noʼuraajüin. Saainjünüle tia süchikijee wanee outkajawaa, motsoʼoinjatüin shia sümaa. Chi wawala ekirajüinjachikai soʼu kaʼikat tia, yapainjatü nutuma tü nünüikinjatkat süpüla anainjatüin sukuwaʼipa tü aküjaakat pütchi natuma na wawalayuukana. Sutuma wainmain na wawalayuu ojuʼitawaikana neʼe saawanoʼu, eesü süpüla süküjünüin namüin nachikuaʼa tü nanüikinjatkat sünain aküjaa pütchi. Anuu sooʼomüin tü kasa eekat süpüla püküjain.

• Tü wanüikinjatkat sünain aküjaa pütchi ojuʼitaka sünain Wekirajaayainjatü sünain tü outkajawaakat Wakuwaʼipa otta Waʼyataain nümüin Maleiwa.

• Sukuwaʼipainjatka wanüiki waashajaapa süchiki wanee kasa alataka.

• Sukuwaʼipainjatka wanüiki nnojorüle naapajeein na wayuukana tü pütchikat.

• Sukuwaʼipainjatka wanüiki nümüin wanee wayuu manoulasai, nümüin wanee wayuu anoujakai sünain tü evoluciónkat, namüin na wayuu naatakana anüikii jee nümüin wanee wayuu suluʼukai wanee iküleesia naatajatü.

• Sukuwaʼipainjatka waküjia pütchi süka jw.org, JW Library^® jee süka tü Bibliakat.

• Sukuwaʼipainjatka watuma tü karaloʼutakalüirua otta tü video wekirajakalü aka wayuu.

• Tü jülüjainjatkat waaʼin waküjainjanale pütchi sükajee carta, suluʼupünaa teleepono, eere jouluin maʼin wayuu, wouyantapa nanainmüin na wayuukana otta wekirajapa wayuu.

• Tü eejüinjatkat oulia waaʼin waküjapa pütchi, tü waaʼinrüinjatkat süpüla waküjain pütchi sümüin wayuu maʼleekalia, kamaneein waya sümüin wayuu jee süpüla ayatüin waküjain pütchi.

• Wanee pütchi jee shiale wanee video suluʼujee tü poyeetokot Ayata pia sünain aashajeʼeraa otta ekirajaa.

• Tü waaʼinrüinjatkat süpüla wakaalinjain na wawalayuu ojuʼitakana wamaa sünain aküjaa pütchi.

• Wanee wetsiikulo wanaapünaaka sümaa tü aküjaakat pütchi jee shiale süchiki wanee kasa anasü alataka nümüin wanee wawala sünain aküjaa pütchi.