Süpüla naʼaleewajainjanain na wekirajüinkana nümaa Jeʼwaa otta laülaainjatüin naaʼin sünain anoujaa, nnojotsü nekirajaainjatüin neʼe tü kasa mapüleekat suluʼujee tü Bibliakat (Mt 5:3; Heb 5:12–6:3). Choʼujaasü nekirajaain süpüla kooʼomüinjatüin tü nanoulakat.

Puʼttaiwaʼaya sünain ekirajaa na pikirajüinkana, püküja namüin tü naaʼinrüinjatkat süpüla yapatüjüliinjatüin natuma tü pütchi pikirajüinjatkalü anain (mwb18.03 6). Püküja namüin jamüin choʼujaaka noʼuraajüin süpülapünaa nekirajaain sünain tü Bibliakat. Pükaalinja naya süpüla natüjain süpüleerua jw.org otta JW Broadcasting^® jee mayaa atüjeena naya süpüleerua achajawaa pütchi suluʼu jee nekirajaain sünain. Pikiraja naya süpüla kiʼrainjanain sünain aashajeʼeraa tü Bibliakat kaʼiwai, yapainjatüin natuma tü pütchi süpülajatkat tü outkajawaakat otta natüjain süpüleerua nachajaain susoutia tü natüjaweekalü aaʼu. Pütütüleʼera naya süpüla nasakireʼerüin naaʼin sünain tü nekirajaakalü anain.

SÜCHIKIJEE JÜNAJÜIN TÜ VIDEOKOT PÜKAALINJA NA PIKIRAJÜINKANA SÜPÜLA NEKIRAJAAIN SÜPÜLA KOOʼOMÜIN NANOULA, JUSOUTA SHIʼIPAJEE TÜÜ:

• ¿Kasa saaʼinraka Neeta süpüla shiyaawatüin aaʼu Jade tü saaʼinrüinjatkat shikirajaapa sünain tü Bibliakat?

• ¿Jamüsü shiyaawataka saaʼu Jade mojuin nümüin Jeʼwaa tü amaʼüjirawaakalü akuwaʼipaa?

• ¿Jamüsü sütüjaaka saaʼu Jade anain maʼin süsakireʼerüle saaʼin?