Aküjüinjana maʼin waya pütchi maaʼutpünaa süka sülüʼülüin maaʼin tü müliaa miyoʼusükat (Pr 24:11, 12, 20). Wanee kasa jalouika maʼin süpüla wakaaliinjain na wayuukana shia tü tarüjeeta süpülajatkat jw.org. Tia tarüjeetakat süpülajatü naashajeʼerüinjatüin tü Wiwüliakat na wayuukana otta nanaʼlaain tü eʼitaanakat suluʼu Internet. Eesü wanee koodigo sünain kaluʼuka tü videokot ¿Jamüshii wekirajaainjanaka sünain tü Wiwüliakat? Otta wanee karaloukta nipirajüinjatka eekai nuchuntüin ekirajawaa sünain tü Wiwüliakat jee shiale süpüla saapünüin karaloukta nümüin. Eeshii na mamalainkana amüin tü karalouktakalüirua, anapejeʼe namüin nanaʼlüin tü suluʼukat jw.org. Müle nakuwaʼipa, paapa namüin tü tarüjeetakat. Nnojoluinjatpajaʼa waapüin shia namüin na mamalainkana amüin tü pütchikat.

Eepünaale jalain waya, eesü süpüla müin wanüiki namüin na wayuukana: «Tasülajeein pümüin tarüjeetakat tüü. Aküjünüsü yala süchiki wanee paajina kaluʼuko video otta pütchiirua süchiki watta saalii kasa» (Jn 4:7). Anasü walüʼüjale waneepia tü tarüjeetakat süka joʼuuchon shia, paapa shia namüin na wayuu anakana amüin nanaʼlüin suluʼu jw.org.