¿Kasa püchekaka süpüla jaʼyainjatüin saaʼu nukuwaʼipa wanee paʼaleewain? Eesüjaʼa shiale pücheküin waneepiainjachin nia pümaa, anamiainjachin nia otta asülajülinjachin nia. Müsü nukuwaʼipa Jeʼwaa maʼaka saaʼin tia (Éx 34:6; Alu 14:17). Naapajüin Jeʼwaa pünüiki puʼuraajapa nümüin otta nükaalinjain pia soʼu tü kaʼi choʼujaakalü oʼu shia pümüin (Sl 18:19, 35). Paainjale wanee kasa mojusü sümaa nnojolin paainjeein shia, nülatirüin Jeʼwaa puulia paainjala (1Jn 1:9). ¡Anakaiche maʼin Jeʼwaa süpüla aleewain waya nümaa!

¿Kasa paaʼinrüinjatka süpüla paʼaleewainjachin Jeʼwaa? Paashajeʼerüinjatü tü Wiwüliakat süpüla piʼraajüinjachin nia otta piʼitaainjatüin paaʼin nünain (Sl 62:8; 142:2). Tü kojutukat maʼin nümüin Jeʼwaa, kojutuinjatü shia pümüʼinyaa, kojutuinjachi pümüin chi Nüchonkai, tü sukuwaʼipakat Nuluwataaya otta tü kasa anasü eejeetka nutuma soʼu palit kaʼi. Waashajaa nüchiki Jeʼwaa namüin waneinnua wayuu (Dt 32:3). Müleka aleewale maʼin pia nümaa Jeʼwaa, eejeechi nia pümaa süpüla kaʼikat süpüshuaʼa (Sl 73:25, 26, 28).

SÜCHIKIJEE JÜNAJÜIN TÜ VIDEOKOT JIMAʼALII JEE MAJAYÜNNÜÜ: «JÜTÜJAA SAAʼU ANAMIAIN JEʼWAA», PUSOUTA SHIʼIPAJEE TÜÜ:

• ¿Kasa paaʼinrüinjatka palajana süpüla paapüinjatüin paaʼin nümüin Jeʼwaa jee woutiisain pia?

• ¿Kasa nakaalinjainjachika anain pia na wawalayuukana süpüla anaʼleeinjatüin piʼyataain nümüin Jeʼwaa?

• Püküjale maʼin pütchi nüchiki Jeʼwaa, ¿jamüshi aleewaleejeechika pia nümaa sutuma tia?

• Wainma tü aʼyatawaa eekat süpüla piʼyataain suluʼu nupueulose Jeʼwaa, ¿jarat shia?

• ¿Kasa kamalainka maʼin pümüin sünain nukuwaʼipa Jeʼwaa?