Nüküjain Jesuu süchiki tü nukuwaʼipakat Maleiwa sünain Aluwatawaa otta nikirajüin na wayuukana süpüla nachuntuinjatüin süntüin tia Nuluwataayakat Maleiwa (Lu 4:43; Mt 6:9, 10, TNM). Soʼu kashika nowienpüroʼu, shieerü waaʼinmaaka maʼin waküjainjatüin pütchi süchiki nukuwaʼipa Maleiwa sünain Aluwatawaa (Mt 24:14). Shiainjaʼa maʼin anaka, wakumajüle sukuwaʼipa süpüla waküjainjanain maʼin pütchi soʼu kaʼikalüirua tia, ¿aashi müin? Na pürekutsooleekana aaʼusiliaat soʼu kashikat tia, eesü süpüla naainjain 30 jee shiale 50 oora.

Püküjapa pütchi, anasü maʼin püneeküle wanee wetsiikulo aashajaaka süchiki Nuluwataaya Maleiwa jee paashajeʼerüin shia sümüin wainma wayuu. Süpülapünaa püneeküin tü wetsiikulokot, jülüja paaʼin kasain sunoujain waneʼewai sukua tü wayuukoluirua. Eere wanee wayuu kamalainkai amüin pütchikat soʼu tü palajatkat pukua, paapa nümüin wanee karaloʼuta Aapiria Wayuu nuumero 2, 2020 (süpülajatkat wayuu süpüshuaʼa). Puuyanta püchikuaʼa nipialuʼumüin chia wayuukai soʼu palit kaʼi otta pikiraja nia sünain tü Wiwüliakat sükajee tü wekirajakalü aka wayuu. Choʼujaʼalaa neʼe motsomüin süpüla sajaʼlajeʼerüinjatüin tü Nuluwataayakat Maleiwa tü sukuwaʼipakalüirua aluwatawaa eekat yaa mmapaʼa (Da 2:44; 1Co 15:24, 25). Anashaatasü maʼin sünainre waya aküjaakat pütchi tüü süpüla weeʼiyatüinjatüin nümüin Jeʼwaa waneepiain waya nümaa otta kojutuin wamüin tü Nuluwataayakat.