Wayakana Aküjaliikana pütchi nüchiki Jeʼwaa, talatashaatasü waaʼin saaʼujee wanee kasa: aleewain waya nümaa Jeʼwaa chi Laülaakai saaʼu kasa süpüshuaʼa. Arütkaashii waya nünainmüin Maleiwa nükajee chi Nüchonkai otta naapajüin wanüiki woʼuraajapa nümüin (Sl 34:15; Jn 6:44).

¿Kasa waaʼinrüinjatka süpüla ayatüin waya aleewain nümaa Maleiwa? Nnojo waaʼinrüin tü kasa mojusü naaʼinrakat na israeliitakana. Süchikijee napansaajüin nanüiki nümüin Jeʼwaa, naainjain wanee paaʼachon süka ooro otta naʼwaajüin shia (Éx 32:7, 8; 1Co 10:7, 11, 14). Wasakira waaʼin sünain tüü: «¿Kasa taaʼinraka suuʼulakünüle taaʼin? ¿Jaʼyasüche taaʼu kojutuin tamüin ayatüin aleewain taya nümaa Jeʼwaa?». Nnojoleerü waaʼinrüin tü kasa mojukat noʼuluʼu Jeʼwaa süka aishaatain nia wapüla süka süpüshuaʼa waaʼin (Sl 97:10).

SÜCHIKIJEE JÜNAJÜIN TÜ VIDEOKOT AYATA ALEEWAIN WAYA NÜMAA JEʼWAA (COL. 3:5), JUSOUTA SHIʼIPAJEE TÜÜ:

• ¿Kasa jaʼyaka naaʼu wanee wayuu kachiiruakai aaʼin washirüü?

• ¿Jamüsü wayoutuinjatka tü washirüükat otta tü aʼwaajakat maleiwayaasü?

• Tü amaʼüjirawaakalü akuwaʼipa, ¿jamüsü maka aka saaʼin aʼwaajaa maleiwayaasü?

• Na wawalayuu eʼitaanakana ajapuluʼu aʼyatawaa suluʼu tü outkajaaleekat, ¿jamüsü naapüinjatka sümüin tü naʼwayuusekat tü kasa choʼujaakat sümüin?