Nnojo paashajaain maʼin. Nnojo paashajaain süchiki süpüshuaʼa tü pütchikat. Nüsakirapuʼuin Jesuu na wayuukana süpüla nayaawatüin saaʼu tü pütchikat (Mt 17:24-27). Püsakirüle chi pikirajüinkai, nnojoleerü akuʼlajaain naaʼin otta pütüjaajeerü aaʼu kasain nunoujain anain jee niyaawatüle saaʼu tü pütchikat (be-S süp. 253 püt. 3, 4). Nnojo pusounnajaain, paʼatapaja nusouktüin chi pikirajüinkai püsakirüle nia. Nnojo püküjüin nümüin susouktia tü pütchikat, püsakira nia wanee kasa süpüla nüntüin sünain tü susouktiakat (be-S süp. 238 püt. 1, 2). Nnojo kajaalapüin maʼin pia paashajaapa süpüla niyaawatüinjatüin saaʼu tü pütchikat (be-S süp. 230 püt. 4).

Nnojo shukuleraain putuma tü püküjakat. Nnojo paashajaain süchiki süpüshuaʼa tü kasa pütüjaakalü aaʼu süchiki tü pikirajakalü anain (Jn 16:12). Pikiraja neʼe nia sünain tü kasa nütüjaainjatkalü aaʼu (be-S süp. 226 püt. 4, 5). Wainmale maʼin tü kasa pikirajakalü anain nia, nnojoleerü apütüüin nikiiruʼu tü kasa nütüjaainjatkalü aaʼu jaʼitairü anain maʼin pünüiki (be-S süp. 235 püt. 3). Niyaawatüle saaʼu tü pütchikat, pülatiramaata nia sünainmüin tü wanee pütchikat.

Nnojo pikirajüin nia sünain wainma pütchi. Tü keeʼireekat waaʼin shia sujutuuinjatüin tü pütchikat suluʼumüin naaʼin, nnojotsü naashajeʼerüinjatüin neʼe shia (Lu 24:32). Paashajeʼera tü wetsiikulo sünainpünaakat tü nikirajaakalü anain (2Co 10:4; Heb 4:12; be-S süp. 144 püt. 1-3). Mapülee putuma shiyaawatia tü pikirajakalü anain (be-S süp. 245 püt. 2-4). Jülüja paaʼin tü kasa isakat nüchiki wanee pikirajüin, tü nunoujakalü anain otta pikiraja nia wanaapünaa sümaa tia. Püsakira nia sünain tüü: «¿Jamüsüche saaʼin pümüin tü pikirajaakalü anain soʼu kaʼi? ¿Kasa shikirajaka anain pia nüchiki Jeʼwaa? ¿Kasa anasü piʼreetka paaʼinrüle tü sümakat pütchikat tüü?» (be-S süp. 238 püt. 3-5; süp. 259 püt. 1).