Aküjashi pütchi Jesuu sümüin tü wayuu samariajeʼewatkat süka naashajaain palajana sümaa. ¿Kasa waaʼinrajatka süpüla watüjain yootoo namaa na wayuukana jaʼitainna nnojoliin weʼraajüin naya?

• Kamanee pia otta püsaka na wayuukana. Aashajaashi Jesuu sümaa tü wayuukot mayaapejeʼe mapüsain nia. ¿Jamüsü sukuwaʼipa nutuma? Achuntushi wüin nüsüin. Eeshi süpüla kamaneein pia püsakapa wanee wayuu, paashajaa namaa süchiki jaʼin chi kaʼikai, miyoʼuin tü juyakat jee shiale süchiki wanee kasa jeketka alatüin. Shia paaʼinmaainjatka paashajaain namaa, makalaka paashajaainjatüin süchiki wanee kasa yooteeka atuma na wayuukana. Nnojo mojuin paaʼin nnojorüle saashajaain wayuu pümaa. Puuʼulaka paashajaain nümaa wanee wayuu naata. Puchunta nümüin Jeʼwaa yalayalain paaʼin (Ne 2:4; Alu 4:29).

• Eeja paaʼin süpüla püküjan pütchi, nnojoitpajaʼa pia ashapajaainjachin. Ayata neʼe yootuin pia. Püshapajaale süpüla püküjain pütchi, eesü süpüla mojushiin shia sümüin wayuu jee nnojoluin saashajaain pümaa. Nnojo mojuin paaʼin suuʼulaale wayuu suulia yootoo pümaa nnojoliiwaʼaya püküjain pütchi sümüin nüchiki Jeʼwaa. Mmorüle pia seema tia, puuʼulaka yootuin pia sümaa nnojoluin püküjain pütchi. [Piʼitaa tü videokot 1 jee pikirajaa sünain namaa na jutkatüshiikana].

• Pukumaja sukuwaʼipa süpüla püküjain pütchi. ¿Jamüinjatü sukuwaʼipa putuma? Eesü süpüla anain pünüiki süchiki tü punoujakalü anain jee suluʼujee tia süsakireechi pia wayuu süchiki. Shia naainjaka Jesuu tia, nüküjain sümüin tü wayuu samariajeʼewatkat wanee kasa ponoko saaʼin, süsakiraka nia sünain. Asoutushi Jesuu sümüin wanaa sümaa nüküjain süchiki Nuluwataaya Maleiwa. [Piʼitaa tü videokot 2 jee pikirajaa sünain namaa na jutkatüshiikana. Paaʼinra tia süka tü videokot 3].