Soʼu tü kashikat nowienpüroʼu, waküjeein namüin na wayuukana kepieenain waya suluʼu wanee mma anasü (Sl 37:10, 11; Alat 21:3-5). Shiainjaʼa maʼin anaka wakumajüle sukuwaʼipa süpüla waküjainjanain maʼin pütchi soʼu kaʼikalüirua tia, ¿aashi müin? Na pürekutsooleekana aaʼusiliaat soʼu kashikat tia, eesü süpüla naainjain 30 jee shiale 50 oora.

Püküjapa pütchi, anasü maʼin püneeküle wanee wetsiikulo aashajaaka süchiki tü Paʼaraiisükat jee paashajeʼerüin shia sümüin wainma wayuu. Süpülapünaa püneeküin tü wetsiikulokot, jülüja paaʼin tü kamalainkat namüin na wayuukana eere püküjain pütchi. Eere wanee wayuu kamalainkai amüin tü pütchikat soʼu tü palajatkat pukua, paapa nümüin wanee karaloʼuta Aapiria Wayuu nuumero 2, 2021 (süpülajatka wayuu süpüshuaʼa). Puuyanta püchikuaʼa nipialuʼumüin chia wayuukai soʼu palit kaʼi otta pikiraja nia sünain tü Bibliakat süka tü poyeetokot Anainjatka atuma pukuwaʼipa waneepia. Talatüsü maʼin waaʼin süka waküjainjanain namüin na wayuukana tü pütchi anasü talatüinjatkat atuma naaʼin (Is 52:7).

SÜCHIKIJEE JÜNAJÜIN TÜ VIDEO JAYEECHIMAAJATKAT MAA SULUʼUKAI PAAʼIN JEKETKAT MMA, JUSOUTA SHIʼIPAJEE TÜÜ:

• ¿Kasa anasü jülüjaka saaʼin tü jintutkat?

• Sünainjee tü eejeetkat suluʼu tü paʼaraiisükat, ¿kasa piʼreeshaataka amüin?

• ¿Jamüsü keeʼireejeetka paaʼin püküjain maʼin pütchi soʼu kashikai nowienpüroʼu jülüjale paaʼin tü kasa anasü eejeetkat watta kaʼi? (Lu 6:45).