Anasü maʼin süpüla washatüin nukuwaʼipa Isaías. Niiʼiyatüin kanoulain maʼin nia jee oʼunamaatüshi eere choʼujaain akaaliinjaa, mayaapejeʼe nnojoluin nütüjaain saaʼu jameerüin nukuwaʼipa chamüin (Isa 6:8). ¿Jama piakai? ¿Eeshiche süpüla pukolojooin sümaa puʼwayuuse jee püchonnii eere choʼujaain aküjülii pütchi? (Sl 110:3). Süpülapünaa paaʼinrüin tia, acheküsü jülüjain paaʼin palajana jeʼrainjatüin sujuʼitaka aaʼu (Lu 14:27, 28). Wainmapajaʼa tü kasa waaʼinrüinjatkat süpüleerua waküjüin tü pütchi anasükat (Mt 8:20; Mr 10:28-30). Maʼaka weʼrüin suluʼu tü videokot Okolojooshii waya süpüla akaaliinjaa, alanaʼaleejeeria tü kasa anasü naapeetkat wamüin Jeʼwaa saaʼu waʼyataain nümüin suulialeʼeya tü kasa waaʼinrakat neʼe.

• ¿Kasa naaʼinraka chi wawalakai Williams sümaa nuʼwayuuse otta nachonnii süpüla nokolojooinjanain chamüin Ecuador?

• ¿Kasa jülüjaka naaʼin süpülapünaa naneeküin jalainjanain nakolojooin?

• ¿Kasa anasü naapaka Jeʼwaa namüin?

• ¿Jalasü aküjünüin sooʼomüin süchiki tü waaʼinrajatkat wokolojoweere eere choʼujaain akaaliinjaa?

• ¿Kasa taaʼinrajatka sümaa taʼwayuuse jee tachonnii süpüla kooʼomüin watuma waʼyataain sünain aküjaa pütchi? (km-S 8/11 süp. 4-6).

• Müleka isale wachiki wokolojooin, ¿kasa waaʼinrajatka süpüla wakaaliinjain na wawalayuukana eere woutkajaain? (w16.03 29-31).