Jemeisü taya chaa Galicia, palaajeeruʼusü shia sünain España. Akaratshishii na tawalayuukana. Talatapuʼusü maʼin waaʼin wapüshuaʼa. Soʼutpünaa juyakat tia, na kachonshiikana najütapuʼuin nachonnii süpüla nekirajünüin süpüla monjainjanain naya. Oʼunusü taya namaa piamashii tawalayuu.

Wanaa sümaa 13 touyase oʼunusü taya süpüla monjainjatüin chaa Madrid, eejatü yala wanee tawala. Mamaneesalii na wayuu ekirajakana taya, nnojoishii aleewajiraain naya shia neʼe aküjünakat wamüin waresaajüinjanain jee apülajünüsü woulia wainma kasa. Wattachon maalü oʼunawaishii waya suluʼu tü capillakat süpüla sotuinjachin waaʼin Maleiwa, wattapejeʼe neʼe taaʼin suulia tia. Eeʼirajapuʼushii waya shiasaʼa mapa oʼunaa müshia waya sünain emiisajaa. Aküjünüsü shia suluʼu tü anüikiikat latín müsüjeseʼe nnojoluin kasain tayaawatüin aaʼu nüchiki Maleiwa, müsü neʼe wattakai maʼin taya nuulia. Koʼutüinjatü taya waneepia, nnojotsü süpüla taashajaainjatüin. Wanaapa taya sümaa tü tawalakat nnojoishii süpüla waashajaain, shia neʼe eeka süpüla wamajiraain: «Ave María purísima». Aapünawaisü wamüin 30 minuuto neʼe süchikijee tü weküinkat süpüla yootojiraain waya. Tasukajüin maʼin chain taya tepialuʼu süka tamüiwaʼain maʼin aaʼin jee aʼyalajüsü taya waneepia.

Mayaainjeʼe müin nnojotkai pejein taya nünain Maleiwa, monjasü taya wanaa sümaa 17 touyase. Taaʼinrüin neʼe tia süka shiain nacheküin tapüleerua na kachonniikana taya. «¿Tapülajatche eera tüü?» maʼwaisü taya. Nayasaʼa na ekirajakana waya müshii naya wamüin: «Wainmajüle jaaʼin mülieena jia saʼaka siki». Ayatapejeʼe wainmajüin taaʼin waneepia. Tatüjaa aaʼu nnojolin nümüiwaʼapuʼuin Jesucristo, alatitpuʼushi kaʼi nia sünain ekirajaa jee akaalinjaa wayuu (Mateo 4:23-25). Wanaa sümaa 20 touyase nnojotsü taaʼin süpüla ayatüinjatüin sünain monjain taya. Sümaka tamüin tü madre superiora münakat, «wainmajüle paaʼin shia anaka aluʼu puʼunule yaajee». Toʼunaka suluʼujee tia conventokot. Jülüjakajasaʼa saaʼin wanaaweenain tamaa na waneinnua makatüle taya yala.

Taleʼejapa miichipaʼamüin nnojoishii jashichin tamüin chi tashikai jee tü teikat sünainjee tü taaʼinrakat. Süka nnojoluin eein aʼyatawaa suluʼu tü pueulokot oʼunusü taya Alemania occidental, eere kepiain wanee tawala. Namaapuʼushii waneinnua wayuu comunista chejeʼewalii España, anasü taaʼin namaa naya wayuukana süka naʼyataain maʼin süchiirua kojutuinjanain na aʼyataaliikana jee müshiʼiya na jieyuukana. Comunistaka taya jee mapa kasaatsü taya nümaa wanee wayuu comunista. Eitajapuʼusü taya karaloʼuta süchikimaajatü comunismo jee oʼunapuʼusü taya sünain protesta. Anasü taaʼin sutuma tü taaʼinrakat.

Shiasaʼa joo mapa nnojoluitpa kamalain maʼin tamüin tü kanüliakat comunismo. Soʼu tü juyakat 1971 mojuleesia tamüin tü naaʼinrakat na comunistakana süka nnojoluin naaʼinrüin tü naküjakalü achiki. Jamüshiijaʼa waneinnua jimaʼalii jee majayünnüü naainjain protesta saaʼujee mojulaain na aluwataakana chaa España naashin, jee naʼajüin tü consuladokot español chakat Fráncfort. Nnojotsü anain tamüin tü naaʼinrakat.

Wanaa sümaa jemelin chi palajachikai tachon taküjain nümüin chi taʼwayuusekai nnojoluinjatü joo toʼunuin sünain tü outkajawaa naaʼinrakat na comunistakana. Müsü tamüiwaʼakai aaʼin nümaa neʼe chi tachonkai süka nnojoluin nalapalaain waaʼu na waʼaleewainyuu comunistakana. Tatüjawee aaʼu kasapülajanain nukumajaka waya Maleiwa. ¿Anasüche waʼyataale süchiirua anainjatüin sukuwaʼipa wayuu?

Soʼu 1976 antüshii miichipaʼamüin piamashii aküjalii pütchi nüchiki Jehová jee napütaka tapüla waneirua karaloʼuta suluʼujeejatü tü Bibliakat. Naleʼejapa nachikuaʼa tasakirüin naya jamüin müliaka wayuu otta jamüin eeka mojulawaa. Naküjain tamüin sükajee tü Bibliakat süpüshuaʼa tü tasakirakalü anain. Toʼttaka sünain ekirajawaa sünain tü Bibliakat.

Ekirajaasü neʼe taya shiiʼiree tatüjaainjatüin. Shiasaʼa mapa oʼunusü taya nümaa chi taʼwayuusekai sünain tü outkajawaakat namaa na aküjaliikana pütchi nüchiki Jehová. Piamashii wachonnii soʼu tia. Nasaajapuʼuin waya na Aküjaliikana pütchi süpüla namaain waya sünain tü outkajawaakat otta naaʼinmajüin na wachonniikana soʼunnaa tü outkajawaakat. Aleewapuʼusü maʼin taya namaa.

Mayaainjeʼe müin takuwaʼipa ayatüsia wainmajüin taaʼin. Wanaa sümaa talapalaain na tapüshikana chaa España, eeshi wanee talaüla sacerdote aküjakai tamüin anain tooʼulaale suulia ekirajawaa namaa na Aküjaliikana pütchi. Nakaalinjapejeʼe maʼin taya na wawalayuu chejeʼewaliikana España. Nasoutuin tamüin tü wainmajakalü atuma taaʼin sükajee tü Bibliakat müsüjeseʼe tekirajüin tachikuaʼa taleʼejapa miichipaʼamüin. Mayaainjeʼe nnojoluin nikirajaweein chi taʼwayuusekai ayatüsia taya ekirajaain. Woutiisasü taya soʼu 1978 süpüla taküjalinjatüin pütchi nüchiki Jehová.

Sünainjee tü tekirajaakalü anain sünain tü Bibliakat tayaawata aaʼu jamüin nukumajaka taya Maleiwa. Jamüsüjaʼa suluʼu 1 Pedro 3:1-4 süküjain namüin na jieyuu kaʼwayuuseshiikana jüüjüüinjanain naya namüin na naʼwayuusekana otta kojutuinjanain naya namüin. Otta aküjünüsü suluʼu kojutuin nümüin Maleiwa na jieyuu kaʼwayuusekana nnojoliikana aashichijaain jee anamiakana. Sünainjee tü tekirajaakalü anain suluʼujee tü Bibliakat anasü takuwaʼipa nümaa chi taʼwayuusekai jee namaa na tachonniikana.

Alatüsü suulia 35 juya sünain taküjalin pütchi nüchiki Jehová. Talatüsü maʼin taaʼin süka taʼyataain nümüin Jehová namaa na tawalayuu makana aka saaʼin tapüshi. Naʼakajee na jaʼraishiikana tachonnii, pienchishii na aʼyataakana nümüin Jehová.