Sutuma nnojoluin nüleʼeruʼuin kaainjalaa Jesús nnojotsü alatüin nümüin tü makalü aka saaʼin tü alatakat wamüin, maʼaka saaʼin shapawaa aaʼin. Amülialaapejeʼe maʼin naaʼin naaʼu na wayuukana müsüjeseʼe nükaalinjain naya. Wainma kasa naaʼinraka napüleerua. Sutuma sümülialüin naaʼin naaʼu na wayuukana nükaalinjain naya. Aküjünüsü suluʼu kapiitulo 32, 37, 57 otta 99 waneirua kasa naaʼinraka Jesús.

Arütkaapuʼusü wayuu nünainmüin Jesús maʼaka saaʼin wayuu laülaayuu, jimaʼalii jee tepichi. Naainjain tia süka kamaneein nia namüin jee nnojoluin yaletüin naaʼin. Neʼrapa na wayuukana kapülain naaʼin Jesús tü nakuwaʼipakat anasü naaʼin nümaa. Wekirajaa süchiki tia suluʼu tü kapiitulokat 25, 27 otta 95.

Oʼuraajawaishi Jesús waneepia. Eeshi nuʼuraajawaire namaa na aʼwaajakana Maleiwa nümaa jee shiale nümüiwaʼa. Wainmatua nuʼuraajapuʼuin süpüla kaʼikat, nnojotsü naaʼinrüin neʼe shiain süpüla niküin. Nuʼwaajapuʼuin Maleiwa sünain oʼuraajaa otta naapüin tü analuʼutkat nümüin süpülapünaa naaʼinrüin wanee kasa. Süpüla watüjaain saaʼu sooʼomüin süchiki tia waashajeʼera tü kapiitulokat 24, 34, 91, 122 otta 123.

Mayaainjeʼe choʼujaain nümüin Jesús neemeraain, nnojotsü jülüjain naaʼin tia, shia keeʼireeka naaʼin nükaalinjain na wayuukana. Nnojotsü jülüjain neʼe naaʼin nukuwaʼipa nümüiwaʼa. Anasü müle wakuwaʼipa maʼaka naaʼin nukuwaʼipa Jesús. Wekirajaa sünain jamüin sukuwaʼipa nutuma suluʼu tü kapiitulokat 19, 41 otta 52.

Nikirajüin Jesús motuinjatüin waaʼin naainjala na waneinnua maʼaka naaʼinrüin shia namüin na nikirajüinkana jee müshiʼiya namüin na waneinnua. Wekirajaa süchiki tia suluʼu tü kapiitulokat 26, 40, 64, 85 otta 131.

Süküjatüjülia tü Bibliakat leteechin chi Mesíaskai naaʼin na judíokana jee müsia nuʼutuneechin aaʼin natuma na nüʼünüükana. Eesüjaʼa süpüla nümüin Jesús: «Tatüjaa aaʼu outuinjachin taya, ¿jamaka taʼyataainjachikai maʼin?». Mayaainjeʼe nütüjaain aaʼu tü alatajatkat nümüin, nüchajaain maʼin sukuwaʼipa süpüla nikirajüinjatüin wayuu süpüla naʼwaajüinjachin Maleiwa. Anasü maʼin washatüle tü nukuwaʼipakat Jesús wapüleeruaanapa aaʼin jee müliapa waya atumawaa. Jülüja waaʼin tü aküjünakat süchiki tia suluʼu tü kapiitulokat 16, 72 otta 103.

Anaʼleesia maʼin nukuwaʼipa Jesús süka lotuin nukuwaʼipa noulia na wayuukana. Wainma kasa nütüjaka apüleerua sümaa kekiin maʼin nia. Nnojotsü wayuu wanaawaka akuwaʼipa nümaa sümaa maainjalain nia. Mayaainjeʼe müin shia nnojotsü yaletüin naaʼin otta nükaalinjain na wayuukana. Eesü süpüla wekirajaain sooʼomüin süchiki nnojoluin yaletüin naaʼin Jesús suluʼu tü kapiitulokat 10, 62, 66, 94 otta 116.

Nnojorüle noonoomaatüin na aluwataaushikana jee na waneinnua wayuukana sümüin tü nikirajaakalü anain Jesús jee nnojoluin müin nakuwaʼipa maʼaka naaʼin, nnojoishi nia aashichijaain namüin. Nikirajüin wainmatua na nikirajüinkana sümaa kamaneein nia süpüla narütkaainjanain nünainmüin Jehová. Wekirajaa sooʼomüin süchiki tia suluʼu tü kapiitulokat 74, 98, 118 otta 135.