PÜTCHI 6
¿Jara tü pütchi aküjünakat paala nüchiki chi Mesíaskai?
TÜ ALATÜINJATKAT
«Belén Efrata, [...] tojuʼitireechi yalejeechiki chi aluwataainjachikai saaʼu Israel.»
(Miqueas 5:2)
TÜ SHIKERAAJIAKAT
«Süchikijee jemelin Jesuu suluʼu tü mmakat Belén chaa Judea soʼu nükalia Herodes chi sülaülakai mma, antüshii waneeinnua wayuu wüinpejeʼewalii chamüin Jerusalén. Atüjüshii süpüleerua sukuwaʼipa jolotsü.»
(Mateo 2:1)
TÜ ALATÜINJATKAT
«Nasüküijiraain tü saajunakat tasheʼin süpüla shiʼipawalin otta nashantanajiraa aaʼulu tü tasheʼinkat.»
(Salmo 22:18)
TÜ SHIKERAAJIAKAT
«Nakachetpa Jesuu na surulaatkana sünain tü wunuʼukot, nasüküijiraain tü kuluulu saajunakat nüsheʼin sünain pienchin shiʼipapa natuma [...]. Shiasaʼa müin tü nüsheʼinkat, meʼitiasat otta waneʼpüshisü shia. Namajiraakalaka: ‹Anasü nnojorüle wasüküijiraain shia. Shia anaka aluʼu washantanajiraale saaʼu süpüla watüjaain aaʼu jaralinjachin kamüin shia›.»
(Juan 19:23, 24)
TÜ ALATÜINJATKAT
«Naaʼinmajüin süpüshuaʼa tü niipüsekat, nnojoleerü ashateʼennüin waneesiakaije.»
(Salmo 34:20)
TÜ SHIKERAAJIAKAT
«Shiasaʼa joo nantapa nünainmüin Jesuu, nnojotsü nashateʼerüin tü nüsaʼakat süka ouktatüjülinya nia napüla.»
(Juan 19:33)
TÜ ALATÜINJATKAT
«Asotünüshi nia saaʼu tü waainjalakat.»
(Isaías 53:5)
TÜ SHIKERAAJIAKAT
«Niasaʼa joo wanee surulaat, nütküin nia nuwatsepünaa süka wanee jatü, süparalaaka isha otta wüin nüleʼeruʼujee.»
(Juan 19:34)
TÜ ALATÜINJATKAT
«Suwalaajünaka tamüin tü taʼyataainkat, saapünaka tamüin apünüin shikii nneerü pülaata.»
(Zacarías 11:12, 13)
TÜ SHIKERAAJIAKAT
«Niasaʼa Judas Iscariote, chi eejachikai naʼaka na polookana piamamüin aluwataaushii, oʼunüshi nia eemüin chi nekiipüʼükai na sacerdootekana otta nümaka nümüin: ‹¿Kaseerü jaapaka tamüin taapüle nikii Jesuu jümüin?›. Naküjaka nümüin süchiki apünüin shikii nneerü pülaata.»
(Mateo 26:14, 15; 27:5)
