PÜTCHI 7
¿Kasa alatajatka maaʼutpünaa saashin tü Wiwüliakat?
«Eejeerü atkawaa sainküin mmaka süpüshuaʼa [...]. Mülieerü maʼin wayuu sutuma tia kasakalüirua, meerü aka suʼttia saalii joʼuu sümüin jieyuu.»
(Mateo 24:7, 8)
«Wainmeena na wayuu nünüikimaajanayaakana Maleiwa otta neʼikeʼereerü wainma wayuu. Süka nakoʼoomüinraajeenain na wayuu eʼrüliikana wayumüin, ooʼulaajeerü suulia aijirawaa tü wayuukalüirua sainküin mmaka süpüshuaʼa.»
(Mateo 24:11, 12)
«Jaapüle süchiki eeinjatüin atkawaa, nnojo jiyoʼujaain aaʼin. Alatüinjatia neʼe tia süpülapünaa süntüin tü kaʼi sajaʼttüinjatkalü oʼu kasaka süpüshuaʼa.»
(Marcos 13:7)
«Akutkujaajeerü tü mmakat, jouleerü ayuulii otta aijeerü jamü sümüin wayuu sainküin mmaka süpüshuaʼa. Alateerü wainma kasa eekai keemain maʼin otta eeʼiyataajeerü wainma kasa chaa iipünaa.»
(Lucas 21:11)
«Anakajaʼa pütüjaale saaʼu kaseerüin alatüin sülüʼütpa sükalia sajaʼttüinjatüin tü kasakalüirua. Mülieerü maʼin saaʼin wayuu suʼunnaa tia otta alateerü kasa eekai keemain
maʼin. Süka jamüin, eejeenain na wayuu kapülakana aaʼin nakuwaʼipa namüiwaʼa, eekai kachiiruain aaʼin washirüü, pülayaain naaʼin, naʼwaataain suluʼu nakuwaʼipa, naküjüin alawaa, nnojoliin jaa namüin sümüin nei otta nümüin nashi, nnojoliin naapüin analuʼut, mojutüin Maleiwa natuma, maaliin wayuu napüla, nayouktüin süchiki anajirawaa, mojuin nanüiki sujuuna wayuu, nnojoliin nachecherüin naaʼin, nayouktüin süchiki nachiaanüin, nayouktüin süchiki tü kasa anasükat, nemeejüin tü wayuukalüirua, macheʼein sümüin tü münakat namüin, yaletüin naaʼin, nashaittüin waneepia sümaa maaliin Maleiwa napüla, piamain noʼupünaa sünain anoujaa süka nnojoliin noonooin nümaa Maleiwa. Nnojo nanainpünaain pia na wayuu makana akuwaʼipa.»
(2 Timoteo 3:1-5)