Oʼunushi chi tashikai Alemaniajee chaa Australiamüin soʼu 1949 sünain achajawaa aʼyatawaa suluʼu wanee mina otta suluʼu wanee compañía aʼyataaka sünain luusa. Kepiashi nia suluʼu wanee pueulo kanüliakat Victoria eere kasaalüin nia sümaa tü teikat. Joʼuushi taya soʼu 1953.

Shikirajaka mapa tü teikat sünain tü Bibliakat namaa na Aküjaliikana pütchi. Shikirajüinjeseʼe taya tü teikat sünain tü Bibliakat tepichiiwaʼaya taya. Jashichiwaishi maʼin chi tashikai sümüin tü teikat sünainjee sunoula. Mayaainjeʼe mmoluin shia neema ayatüsü shia ekirajaain nujuuna sünain tü Bibliakat süka kojutuin maʼin sümüin tü shikirajaakalü anain. Nnojoitpa chi tashikai shikirajüin taya sümaa tü tawalakat sünain tü Bibliakat. Shikirajüin waya süchiki paʼaraiiseerüin tü mmakat otta aneerüin wakuwaʼipa waaʼinrüle tü sümakat tü Bibliakat (Salmo 37:10, 29; Isaías 48:17).

Oʼunushi taya miichipaʼajee dieciochopa touyase süka mojulaain maʼin chi tashikai. Mayaainjeʼe tanoujain sünain tü sümakat tü Bibliakat, nnojotsü taaʼinrüin tü sümakat. Akumajapuʼushi taya luusa suluʼu tü minakat otta kasaatshi taya veintepa touyase. Apünüin juya süchikijee tia, joʼuusü tü tachonkat. Sutuma tia, tasakireʼeraka taaʼin sünain tü takuwaʼipakat. Tayaawata aaʼu aneerüin takuwaʼipa sümaa tapüshi sutuma tü Bibliakat. Oʼttushijeseʼe taya sünain ekirajawaa namaa na Aküjaliikana pütchi, nnojotpejeʼe anain tia sümüin tü taʼwayuusekat. Soʼu wanee kaʼi toʼunaka oʼu sünain tü outkajawaakat, süküjain tamüin tü taʼwayuusekat toʼunajachin miichipaʼajee ayatüle tekirajaain sünain tü Bibliakat. Sutuma müin sünüiki tamüin, tooʼulaaka suulia ekirajawaa namaa na Aküjaliikana pütchi. Mojukalaka taaʼin mapa süka tatüjaain saaʼu nnojoluin anain tü taaʼinrakat.

Soʼu wanee kaʼi neeʼiyatüin tamüin na aʼyataajiraakana tamaa shiyaakua wayuu masheʼinsat. Mayaainjeʼe kashüülain maʼin tia jee mojuin taaʼin sutuma, teʼree amüinrü shia. Sünainjee tü tekirajaakalü anain suluʼujee tü Bibliakat tayaawata aaʼu kasalajaneerüin taainjala nutuma Maleiwa. Shiʼipaʼaya teʼrajüin shiyaakua wayuu masheʼinsat nnojotsü mojuin shia tamüin otta kiʼrashi taya sünain anajaa shia.

Alatüsü 20 juya sümaa nnojoluin kojutuin tamüin tü shikirajaakalü anain paala taya tü teikat. Sutuma tü tanajakat, yarüttüsü maʼin takuwaʼipa, yarüttüsü maʼin tanüiki otta müsia tü temeeʼerainkat. Mayaainjeʼe tamaain tü taʼwayuusekat wainma tü jieyuu tainkaakalü amaa. «Yarüttüsü maʼin takuwaʼipa otta talerajüin shia», müshi taya soʼu wanee kaʼi teirakaapa suluʼu wanee rouya. Nnojotsü anain taaʼin sümaa tü takuwaʼipakat.

Ojoʼlooshi taya suulia tü taʼwayuusekat otta nnojotsü anain takuwaʼipa. Toʼurajaakalaka nümüin Jehová süka süpüshuaʼa taaʼin. Mayaainjeʼe sülatüin 20 juya oʼttushi taya tachikuaʼa sünain ekirajawaa sünain tü Bibliakat. Wanaapünaa sümaa tia, anaajaashi chi tashikai otta aküjaluitpa pütchi nüchiki Jehová tü teikat.

Nnojotsü pansaain takuwaʼipa sümaa tü sümakat tü Bibliakat. Keeʼireepejeʼe taaʼin anajiraain taya nümaa Maleiwa maʼaka süküjain tü Bibliakat. Tooʼulaaka suulia yarüttüin tanüiki jee taashichijaain. Tooʼulaichipa suulia aʼluwajiraain akuwaʼipa, ashaitaa saaʼu nneerü, epeʼruwaa jee suulia aʼluwajaa suluʼu tü compañía taʼyataakalü aluʼu.

Nnojotsü nayaawatüin aaʼu na aʼyataajiraakana tamaa jamüin suʼwanajaaka takuwaʼipa. Soʼunnaa apünüin juya nachajaain maʼin sukuwaʼipa shiiʼiree mojuinjatüin takuwaʼipa süchikuaʼa. Tooʼulaaka süchikuaʼa tü kasa mojusü taaʼinrapuʼukat. «Ayatüsia nukuwaʼipa maʼakaapuʼu», müshii naya jashichijaale taya jee mojule tanüiki. Aisü maʼin tamüin tü namakat, mojusü taaʼin sutuma.

Eʼrajünüsü maʼin shiyaakua wayuu masheʼinsat eere taʼyataain. Neeʼiyatawalin shia pejeewa na aʼyataajiraakana tamaa, eesü suluʼu karaloʼutain shia jee suluʼu tü nacomputadorakat maʼakaapuʼu tatuma tayakai. Tachajaain maʼin sukuwaʼipa tooʼulaainjachin suulia tü kasa mojusü kiʼrakalü anain taya. Nachajaapejeʼe maʼin sukuwaʼipa nayakana süpüla müinjatüin takuwaʼipa maʼaka naaʼin nayakana. Tachuntapa kaalinwaa nümüin chi wawala ekirajakai taya, naapüin tanüiki jee nütütüleʼerüin taaʼin. Naashajeʼerüin tamüin pütchi suluʼujeejatkat tü Bibliakat süpüla tooʼulaainjachin suulia tü kasa mojusü kiʼrakalü anain taya. Nüküjain tamüin toʼuraajüinjachin waneepia nümüin Jehová süpüla nükaalinjain taya (Salmo 119:37).

Soʼu wanee kaʼi outkajaashi taya namaa na aʼyataajiraakana tamaa. Kottapa naya napüshuaʼa taküjaka namüin saapünüinjatüin piamasü seruweesa namüin piamashii aʼyataajiraakana wamaa asüliikana maʼin. «¿Jamüsü waapüinjatka shia namüin? Nachajaain maʼin sukuwaʼipa nojoʼlooinjanain suulia asaa», müshii naya sümaa jashichin naya tamüin. «Müshia nee tayakai ojoʼloweeshi taya suulia tü kiʼrakalü anain taya», tamaka namüin. Soʼujeʼereeya tia nayaawata aaʼu tooʼulaweein suulia eʼrajaa shiyaakua wayuu masheʼinsat, nnojotkalaka napüleeruain taaʼin tachikuaʼa shiiʼiree tanajüin tia.

Süka nükaalinjain taya Jehová tooʼulaain suulia tü kasa mojusü kiʼrakalü anain taya. Woutiisakalaka taya soʼu 1999. Talatüshi maʼin taya süka sunoutaitpain takuwaʼipa jee anaichipain taya.

Tayaawata aaʼu jooluʼu jamüin nülerajaka Jehová tü kasa mojusü kamalainpuʼukat tamüin. Müshi nia aka naaʼin wanee tashi aaʼinmajakai taya suulia tü kasa mojusü eekat sünainjee eʼrajaa shiyaakua wayuu masheʼinsat. Shiimain maʼin tü sümakat Proverbios 3:5, 6, tü makat mayaa: «Punouja nünain Jehová, nnojo piʼitaain paaʼin sünain tü pütüjaakalü aaʼu. Jülüja paaʼin nia sünain süpüshuaʼa tü kasa paaʼinrakat, loteetkalaka pukuwaʼipa nutuma». Naaʼinmajeein waya Maleiwa sükajee tü nümakat suluʼu tü Bibliakat otta aneerü wakuwaʼipa mapeena waaʼinrüle tü nümakat (Salmo 1:1-3).

Nnojotpuʼusü anain taaʼin sutuma yarüttüin takuwaʼipa, anapejeʼe maʼin taaʼin maaʼulu yaa. Jimatüsü taaʼin sutuma teeʼiratüin takuwaʼipa, wulesü takuwaʼipa otta tayaawata aaʼulu motuitpa naaʼin Jehová taainjala otta nükaalinjain taya. Soʼu tü juyakat 2000 kasaatshi taya sümaa wanee wawala kanüliakat Karolin. Aishi maʼin Jehová süpüla maʼaka taaʼin tayakai, anajiraashii waya jee jimatüsü waaʼin. Kojutusü maʼin wamüin waʼyataain nümüin Jehová namaa wawalayuu wulekana akuwaʼipa jee aijiraakana maʼin.