Kamalaintüjülia tamüin joʼuuiwaʼaya taya tü nukumajalakat Maleiwa. Ojuʼitapuʼushi taya namaa na kachonniikana taya sünain anajaa tü wunuʼuliakalüirua otta türa eekat pejepünaa eere kepiain waya, eere tü pueulokot Jyväskylä suluʼu tü mmakat Finlandia. Kamalaintüjülia tamüin tü mürütkalüirua, jamüshijaʼa joʼuuiwaʼaya taya takoʼoje anain tü etkalüirua otta tü muusa teʼrakat. Temiyoʼulaapa, aisü maʼin tamüin müliain atumawaa tü mürütkalüirua. Makalaka tekerotuin suluʼu wanee organización kasalajanaka atuma wayuu müliaka atuma tü mürütkalüirua, teʼraajaka wainma wayuu wanaawaka aaʼin tamaa.

Aaʼinrapuʼushii waya campaña shiiʼiree saaʼinmajünüin tü mürütkalüirua, eitajapuʼushii waya karaloʼuta otta aaʼinrapuʼushii waya protesta shiiʼiree süsürünnüin tü tienta eere suikünüin süta mürüt otta süpüla süsürünnüinjatüin tü laboratoriokalüirua. Eeka watuma mapa wanee organización. Süka macheʼein maʼin waya süchiirua tü waainjeekat, eeshii jashichire wamüin na pulusiiakana. Kojuyatua amaanain taya laülaapialuʼu jee püreesain taya atumawaa.

Süka shapaain taaʼin sutuma tü kasa mojusü teʼrakat, ekerotushi taya suluʼu wanee organización, Amnistía Internacional sünülia otta wanee Greenpeace, shiaitpa taaʼinmaaka maʼin taʼyataain suluʼu. Aʼyataashi joo taya süchiirua taaʼinmajüin na wayuu müliakana sutuma wanee kasa maʼaka naaʼin na maʼletsekana otta na alatirakana jamü.

Mayaainjeʼe wanouteʼerüin waneirua kasa, isasü wachiki wanouteʼerüin tü kasa kapüleekat maʼin. Müsü akanajuukai saaʼin tü kasa anasükat sutuma tü kasa mojusü jooutkat maʼin, tayaawataleein saaʼu mapa nnojoluin süpüla tanouteʼerüin sukuwaʼipa mmapaʼakat otta nnojoluin kasajatüin tia sümüin wayuu. Sutuma tia, nnojoishi kasain anain apüla taya taaʼinruʼu.

Süka mojuin taaʼin saalinjee isain tachiki tanouteʼerüin tü kasa mojusükat, jülüjashi taaʼin Maleiwa otta tü sümakat tü Bibliakat. Nekirajapuʼuin taya paala na aküjaliikana pütchi nüchiki Jeʼwaa. Shiapejeʼe kojutuin neʼe tamüin kamaneein naya otta kojutuin wayuu namüin. Aluʼuinjaʼa jooluʼu taʼwanajaweein takuwaʼipa.

Tachajaaka tewiwüliase jee taashajeʼeraka shia. Ojutuusü suluʼu taaʼin tü pütchi taashajeʼerakat. Kojuya pütchi aküjakat alinjatüin wapüla tü mürütkalüirua. Jamüsüjaʼa suluʼu Proverbios 12:10: «Chi wayuu lotokoi akuwaʼipa naaʼinmajüin nümüʼlüin» müsü. Tayaawata aaʼu nnojoluin niain Maleiwa kasirüin tü kasa mojusü alatakat otta mojuin sukuwaʼipa mmapaʼakat sutuma nnojoluin kachipünaain saaʼin tü wayuukalüirua tü nümakat Jeʼwaa. Antüsü suluʼumüin taaʼin tatüjaaitpa saaʼu alin maʼin waya nüpüla Maleiwa otta sümülialaain naaʼin waaliijee (Salmo 103:​8-​14).

Wanaa maʼin sümaa tia, tepirajüin wanee karaloʼuta süpüla suluwataanüin tamüin tü karaloʼutakat ¿Kasa shikirajaka maʼin tü Wiwüliakat? Maʼaka jeʼra kaʼi süchikijee tia, antüshi wanee wawala sümaa nuʼwayuuse süpüla nekirajüin taya sünain tü Bibliakat. «Anakajaʼa», tamaka namüin. Outkajamaatüshi taya namaa. Anta, anta, müsü suluʼu taaʼin pansaain maʼin tü shikirajakalü anain tü Bibliakat.

Wainma kasa teeʼirataka sünain takuwaʼipa sutuma tü Bibliakat. Nnojoluichipa taya akamüjain, nnojoluichipa taya eperüi, anaitpa tayolojo, nnojoluitpa yarüttüin tanüiki otta kojutuinnapain tamüin na sülaülashiikana mma (Roma 13:1). Nnojoluichipa taya sünainpünaain amaʼüjirawaa akuwaʼipa maʼaka keejiapuʼuin maʼin shia paala tamüin.

Kapüleepejeʼe maʼin tamüin takatalüin noulia na wayuu aʼyataakana maʼin süchiirua nanouteʼerüin sukuwaʼipa tü kasakalüirua. Isasü maʼin taaʼin süchiirua, mojuwaisü maʼin taaʼin süka nnojoluin taya namaain. Tayaawataka aaʼu mapa niainjachi neʼe Maleiwa anouteʼerüinjachika sukuwaʼipa mmapaʼakat nuluwataapeena. Shiaitpa joo taaʼinmaaka maʼin otta taküjain süchiki tia sümüin wayuu (Mateo 6:​33).

Taʼyataaiwaʼaya süchiirua tanouteʼerüin sukuwaʼipa mmapaʼakat, «eesü wayuu mojulaasü otta wayuu anamia», mapuʼushi taya otta letüsü taaʼin nanain na mojulaashiikana. Aluʼusaʼa jooluʼu, kojutusü wayuu süpüshuaʼa tamüin. Alitpa tapüla wayuu maʼleekalia sutuma tekirajaain sünain tü Bibliakat (Mateo 5:​44). Süka alinnapain tapüla na wayuukana, wainma kasa taaʼinrakat napüleerua maʼaka taküjain namüin süchiki nukuwaʼipa Maleiwa sünain aluwatawaa. Talatashaatasü taaʼin sünain aaʼinraa tia süka tatüjaain aaʼu anain naaʼin na wayuukana sutuma tü pütchikat otta kaʼatapalashii naya sutuma.

Jamaamasü taaʼin süka teʼitaain taaʼin nünain Jeʼwaa sünain niainjachin anouteʼerüin sukuwaʼipa mmapaʼakat. Tatüjaa aaʼu nunouteʼerüinjatüin tü kasa mojusükat chi Kakumajalakai kasakat süpüshuaʼa. Nnojoleerü nuulain Jeʼwaa ayatüin müliain na wayuukana otta müliain atumawaa tü mürütkalüirua. Nuluwataapeena Jeʼwaa saaʼu tü mmakat, najaʼttireerü süpüshuaʼa tü kasa mojusü eekat sutuma wayuu (Isaías 11:​1-9). Talatüsü taaʼin süka tatüjaaitpain saaʼu tü shiimainkat nüchiki Maleiwa otta sutuma taküjain süchiki tia sümüin wayuu. Nnojoluitpa tanouteʼereein sukuwaʼipa mmapaʼakat.