¿KASA naataka piʼrüin suluʼu tü ayaakuaakat? Nia chi palajachikai toolo otta tü palajatkat jierü. ¿Jara kakumajalaka naya? Nia Maleiwa. ¿Pütüjaa aaʼu kasaichi nünülia Maleiwa? Jeʼwaa nünülia. Chi wayuu toolokoi Adán nünülia otta tü jietkat Eva sünülia.

Nukumajüin Maleiwa Adán süka sümamüla mma, süchikijee nujuʼulaka niʼichiruʼu süpüla katüin noʼu.

Aluwataanüshi Adán nutuma Maleiwa sünain eʼinaajaa sünülia tü mürütkalüirua. Kakalia nikirajaain Adán sünain nakuwaʼipa na mürütkana süpüla anainjatüin nutuma tü nanüliakat.

Naainjapa tia niʼrüin piamawalin na mürütkana, eeshi elepante toolo otta jierü, wasashi toolo otta jierü. Akaisaʼa Adán mamaajanasai. Nutunkiraka nia Jeʼwaa süpüla niyuʼluin wanee nuwatse. Naainjaka tü jietkat süka tü nuwatsekat, nuʼwayuuseka shia Adán.

¡Talatüshi maʼin Adán otta Eva süka suluʼuin naya wanee mma anasü! Kachoinjana otta kepiajiraainjana naya sümaa talatüin naaʼin.

Keeʼireesü naaʼin Jeʼwaa katüinjatüin noʼu waneepia otta anachoinjatüin süpüshuaʼa tü Mmakat maʼaka saaʼin Edén. ¡Talatakajasa maʼin Adán otta Eva süka naainjüinjatüin tia! ¿Pücheküinjee piʼyataain suluʼu tü Mmakat süpüla paraiisüin shia? Akaisaʼa Adán sümaa Eva nnojoishii talatüin waneepia. Wekirajaa sünain jamüsü sülataka tia.