NAATAJANA maʼin na piamashiikana tepichi suluʼuka tü ayaakuaakat, ¿aashimüin? ¿Pütüjaa aaʼu kasaichi nanülia? Chi olojuikai nia Esaú, chi arüleejüikai nia Jacob.

Senkeyuu naya, nüchonnii Isaac sümüin Rebeca. Talatüshi maʼin Isaac nümaa Esaú, süka olojulin nia otta antitshi eküülü namüin. Akatsaʼa Rebeca aishi maʼin süpüla Jacob süka anamiain nia.

Katayülia noʼu Abraham chi natuushikai, anasü maʼin nümüin Jacob aapajaa nüchiki Jeʼwaa nutuma chi nutuushikai. Mapa ouktushi Abraham wanaa sümaa 175 nuuyase otta 15 nouyase na senkeyuukana.

Wanaa sümaa 40 nuuyase Esaú kasaatshi nia sümaa piamasü jieyuu manoujuinsalü nünain Jeʼwaa otta kepiashii Canaán. Mojusü maʼin naaʼin Isaac otta Rebeca sutuma tia.

Soʼu wanee kaʼi aküjüinjachi Isaac nümüin chi niʼirumakai süchiki tü kasa anasü anteetkat nümüin sünainjee eʼirumaain nia. Nia eʼirumaaka Esaú, niaka aküjünüinjachin amüin. Akaisaʼa Esaú naapüin tia nümüin Jacob. Wanaa sümaa jemein na piamashiikana tepichi niainjachi Jacob aküjünüinjachika amüin süchiki tü kasa anasü anteetkat naashin Maleiwa. Tia ekeraajüsü. Aashajaashi Isaac nümaa Jacob.

Jashichishi maʼin Esaú nümüin Jacob nütüjaapa saaʼu tia otta nuʼuteeka naaʼin. Mojuka saaʼin Rebeca sutuma tia, sümaka nümüin chi suʼwayuusekai: ‹Mojeerü maʼin waaʼin kasaalüle Jacob sümaa wanee jierü eeka kepiain Canaán›.

Nuunejaka Isaac chi nüchonkai nümaka nümüin: ‹Nnojo kasaalüin pia sümaa wanee jierü eeka kepiain Canaán. Puʼuna eemüin chi putuushikai Betuel chaaʼaya Harán otta kasaalü pia sümaa wanee nüchon Labán›.

Oonooshi Jacob nümüin chi nüshikai, nuʼunaka eemüin na nüpüshikana Haránmüin.