¡PIIRAKAA nümüin chi jintüikai mojusü maʼin naaʼin! Chi jintüikai nia José. Oikünüshi nia natuma na nuwalayuukana namüin na wayuu chainjanakana Egipto. Achepchieeinjachi nia chamüin. ¿Jamüsü naainjaka tia na nuwalayuukana? Shia süka nachunjüin.

Aishi maʼin José nüpüla Jacob, makalaka naainjüin wanee kuluulu anashaatasü nüsheʼinjatü José. Natüjaapa saaʼu na polooshiikana nuwalayuu achunjüshii otta üttüsü naaʼin nünain José.

Aʼlapüjaashi José piantua, nasapainkashii nümülatuʼumüin na nuwalayuukana nüʼlapüinruʼu. Nüküjapa shia namüin na nuwalayuukana naʼürülaleeshia.

Soʼu wanee kaʼi wanaa sümaa narüleejüin na nuwalayuukana, aluwataanüshi José nutuma chi nüshikai sünain analawaa namüin, neʼrapa nia, namaka: ‹¡Jooʼuya woʼutai naaʼin!› Nümaka Rubén, chi nuwala miyoʼushikai: ‹¡Nnojo jaainjüin tia!› Nojutaka nia suluʼu wanee ishi. Nojoyolooka süpüla naashajaain süchiki tü naainjüinjatkat nüka José.

Neʼraka alatüin na ismaeliitakana. Nümaka Judá namüin na nuwalayuukana: ‹Jooʼuya woikai nia namüin na ismaeliitakana›. ¡Noikaka nia saaʼu 20 nneerü pülaata! ¡Mojusü maʼin tia naainjakat!

¿Jameerü nanüiki nümüin chi nashikai? Noʼutaka saaʼin wanee kaaʼula nashulejaka tü süshakat sünain nüsheʼin José, nalüʼüjaka shia nümüin chi nashikai namaka nümüin: ‹Wousüta anainrü tüü. Pünalapa müleka nüsheʼinre shia José›.

Niyaawatapa Jacob tü kuluutkat nümaka: ‹Suʼutakajasa naaʼin José wanee mürüt jashichi›. Tia shia tü keeʼireekat naaʼin na nuwalayuukana. Mojusü maʼin naaʼin Jacob otta aʼyalajüshi nia wainma kaʼi. Akaisaʼa José nnojoishi ouktuin. Wekirajaa sünain tü alatakat nümüin.