¡PIIRAKAA sümüin tü nojoitakat chi wayuukai nipialuʼu! Shia wanee kuluulu anashaatasü, ooro otta pülaata. Nülüʼüjala Jericójee. ¿Sotusü paaʼin tü aainjünajatkat süka tia?

Ajaʼttinnajatü, shia chainjatka suluʼumüin tü aʼwaajüleekat tü oorokat otta tü pülaatakat. Nnojoishii oonooin nümüin Maleiwa nala wayuukana. Naʼluwajüin tü nümüinjatkat Maleiwa. Acán nünülia chi wayuukai otta nüpüshi na nümaakana. Wekirajaa sünain tia.

Süchikijee nuʼluwajüin Acán, natkaaka na israeliitakana namaa na wayuu chajanakana Hai. Nakanajuuka, eeshii eeka ouktuin otta eeka napantajaain. Mojuka maʼin naaʼin Josué. Nümaka nümüin Jeʼwaa sümaa nüsapainkain nia: ‹¿Jamüsü puuʼulaaka sülatüin tia?›

Nümaka Jeʼwaa nümüin: ‹¡Pütamaa! Kaainjalashii na israeliitakana. Naʼluwajüin wanee kuluulu anashaatasü otta tü chainjatkat suluʼumüin tü aʼwaajüleekat, nnojotsü naküjüin süchiki. Mojeerü jukuwaʼipa tatuma aluʼusaʼa jaʼajüle tü kuluutkat otta juʼutule naaʼin chi kaʼruwaraikai›. Nüküjüinjatü Jeʼwaa nümüin Josué jaralin chi kaʼruwaraikai.

Nuutkajeʼeraka Josué na israeliitakana, nüküjaka Jeʼwaa niain Acán chi kaʼruwaraikai. Nümaka Acán: ‹Kaainjalashi taya. Teʼrüin wanee kuluulu anashaatasü, ooro otta pülaata, talüʼüjaka otta tojoitaka shia tepialuʼu›.

Süntinnapa nümüin Josué, nümaka nümüin Acán: ‹¿Jamüsü mojuka wakuwaʼipa putuma? ¡Mojeerü pukuwaʼipa nutuma Jeʼwaa!› Nuʼutunaka aaʼin Acán sümaa nüpüshi süka ipa. Shikirajüin waya tia nnojoluinjatüin walüʼüjüin kasa nnojotka wakoroloin.

Mapa natkaaka nachikuaʼa na israeliitakana namaa na wayuu chajanakana Hai. Nakanajaka nutuma Jeʼwaa.