PIIRAKAA nümüin Josué. Jimatüinjachi chi Kaʼikai naashin, jimataka chi Kaʼikai soʼu wanee kaʼi. ¡Alatüsü tia nutuma Jeʼwaa! Wekirajaa sünain jamüshi jimatüinjachika chi Kaʼikai naashin Josué.

Natkaapa na jaʼraishiikana aluwataalii namaa na gabaoniitakana, naluwataain na gabaoniitakana wanee wayuu eemüin Josué süpüla nükaaliinjüin naya, nümaka chi wayuukai: ‹¡Jooʼuya maalü wamaa! ¡Pükaaliinja waya! Atkaashii napüshuaʼa na aluwataalii kepiakana waʼütpaʼa namaa na püchepchiakana›.

Nuʼunaka Josué otta na surulaatkana saʼwai. Nantapa Gabaónmüin, ainkuusü naaʼin otta apantajaashii nasurulaatse na jaʼraishiikana aluwataalii. Sujutuuka naaʼu miyoʼuyuu shiʼichiise juya nutuma Jeʼwaa, kojuya na ouktakana sutuma shiʼichiise tü juyakat noulia na ouktakana natuma na nusurulaatsekana Josué.

Niʼraka Josué nikeroteein chi Kaʼikai otta eeshii süpüla isain nasurulaatse na jaʼraishiikana aluwataalii. Naashajaaka Josué nümaa Jeʼwaa süpüla jimatüin chi Kaʼikai, jimataka chi Kaʼikai. Nakanajaka na israeliitakana.

Wainma na aluwataalii mojulaashii chajanakana Canaán aʼürülaaka na israeliitakana. Soʼu 6 juya atkaashi Josué otta na nusurulaatsekana namaa 31 aluwataalii chajanaka Canaán. Süchikijee tia niitajaka Josué tü mmakat namüin na israeliitakana.

Mapa ouktaka Josué wanaa sümaa 110 nuuyase. Oonooshii na wayuukana nümüin Maleiwa kataiwaʼaya noʼu Josué otta na naʼaleewainkana. Ouktapa naya, aainjüshii maʼin kasa mojusü na wayuukana otta mojuka nakuwaʼipa sutuma. Choʼujaaipa namüin nükaaliinjüin naya Maleiwa.