PIIRAKAA sümüin tü süchonkat wunuʼu nalüʼüjaka na wayuukana. Miyoʼuyuu maʼin tü uuwakat, nalüʼüjiraain shia piamashii tooloyuu sünain wanee wunuʼu. ¿Jalajatü tü süchonkat wunuʼu? Chajatü Canaán, eepuʼule kepiain Abraham, Isaac otta Jacob. Soʼu tü juya palitchonkat oʼu eküülü akolojooshi Jacob sümaa nüpüshi Egiptomüin. 216 juya süchikijee tia, aleʼejüshii Canaánmüin na israeliitakana nutuma Moisés. Chaka naya Cades, isashiipaʼa.

Mojulaashii na wayuu kepiakana Canaán. Nuluwataaka Moisés 12 ajayajülii nümaka namüin: ‹Jüsakira jeʼra wayuu kepiaka chaaʼaya otta katchinre naya. Jünala tü mmakat, anale apünajaa suluʼu otta jülüʼüja süchon wunuʼu chejee›.

Naleʼejapa, namaka nümüin Moisés: ‹Anasü tia mmakat›. Neeʼiyataka süchon tü wunuʼu nalüʼüjakat. Akatsaʼa namaka 10 ajayajülii: ‹Miyoʼuyuu otta katchinshii maʼin na wayuu kepiakana chaaʼaya. Wasütüle noulia tü noumainkat noʼuteena aaʼin waya›.

Ayoʼujaasü naaʼin na israeliitakana naapapa tia, namaka: ‹Anashiijee ouktule waya Egipto jee shiale yaaya isashiipaʼa. Oukteena waya sünain atkawaa, ataʼüneena waʼwayuuse otta wachonnii. ¡Waneekaja wanee wekiipuʼu naata nuulia Moisés süpüla waleʼejaain Egiptomüin!›

Akanasaʼa piamashii ajayajülii neʼitaain naaʼin nünain Jeʼwaa, Josué otta Caleb nanülia. Neimaleʼeraka na israeliitakana, namaka: ‹Nnojo mmoluin jia, wamaashi Jeʼwaa. Mapülejeerü wamüin wasütüin tia mmakat›. Macheʼesalii na wayuukana otta noʼutee aaʼinchi Josué nümaa Caleb.

Jashichika maʼin Jeʼwaa sutuma tia, nümaka nümüin Moisés: ‹Nnojoleena antüin Canaánmüin na wayuu eekana 20 nouyase otta eeka nataralaain. Nnojotsü neʼitaain naaʼin tanain sümaa neʼrüin tü kasa pülasü taainjakat chaaʼaya Egipto otta isashiipaʼa. Makalaka kepiainjanain naya 40 juya isashiipaʼa ooʼulaka ouktajana naya chaaʼaya. Nia neʼe Josué otta Caleb antajanaka Canaánmüin›.