¿ISAIRÜ püchiki paainjüin tü pümakat sümaa pansaain paala pünüiki? Alatüsü tia nümüin Jefté, chi wayuu suluʼukai tü ayaakuaakat. Makalaka mojuin naaʼin. Nekiipuʼu nia na israeliitakana.

Soʼu nükalia Jefté nnojoishi naʼwaajüin Maleiwa na israeliitakana. Aainjüshii kasa mojusü nachikuaʼa. Nuuʼulaaka Jeʼwaa müliain naya natuma na ammoniitakana. Namaka na israeliitakana nümüin Jeʼwaa: ‹Kaainjalashii waya. ¡Pükaaliinja waya!›

Mojusü naaʼin na israeliitakana sutuma tü kasa naainjakat. Naʼwaajaka Jeʼwaa nachikuaʼa. Nükaaliinjaka naya.

Naneekaka na israeliitakana Jefté süpüla nütkaain namaa na ammoniitakana. Keeʼireesü naaʼin Jefté nükaaliinjüin nia Jeʼwaa sünain atkawaa. Nümaka nümüin Jeʼwaa: ‹Takanajüle putuma, taapeerü pümüin tü palajatkat wayuu apanapajaka taya süchikijee tü atkawaakat›.

Naapaka Jeʼwaa nünüiki Jefté, nükaaliinjaka nia süpüla nükanajüin. Nüleʼejapa Jefté, ¿pütüjaa aaʼu jarat tü palajatkat wayuu apanapajaka nia? Shia tü waneesükat nüchon. Niʼyalajaka Jefté sümaa nümüin: ‹¡Tachonchee! ¡Mojusü taaʼin putuma! Taapüin tanüiki nümüin Maleiwa otta tekeraajüinjatü shia›.

Sütüjaapa tü nüchonkat saaʼu tü nünüikikat nümüin Jeʼwaa mojuka saaʼin süka süpütüinjachin chi süshikai otta na saʼaleewainkana. Aʼyataainjatü shia waneepia nümüin Jeʼwaa suluʼu tü aʼwaajülee chakat Siló. Sümaka nümüin Jefté: ‹Paapüipale pünüiki nümüin Jeʼwaa, pikeraajüinjatü shia›.

Suʼunaka tü nüchonkat Jefté suluʼumüin tü aʼwaajülee chakat Siló süpüla shiʼyataain waneepia nümüin Jeʼwaa. Waraittüshii saaʼu na jieyuu chejeʼewaliikana Israel, chashii naya sümaa 4 kaʼi juyawai. Aisü maʼin shia napüla süka shiʼyataalüin nümüin Jeʼwaa.