¿KASA ojuttitka süsepü Jericó? Müsü susotookai wanee kasa pasanain sünain, nnojotpejee shiain tia, nnojotsü müin naʼapüla na wayuukana soʼu kaʼikat tia. ¡Shia wanee kasa pülasü naainjaka Jeʼwaa! Wekirajaa sünain tia.

Müshi Jeʼwaa nümüin Josué: ‹Püʼleeyata Jericó watua namaa na surulaatkana soʼu 6 kaʼi. Jülüʼüja tü jurasükeetkat, eeinjana 7 sacerdote süpüleerua sünain naʼyalajirüin tü suʼwakat paaʼa.

‹Soʼu 7 kaʼi jüʼleeyata Jericó akaratshitua. Mapa emetuluinjatü jutuma shiiʼira tü suʼwakat paaʼa otta aʼwaatüinjana jia süpüla jütkaain. ¡Sujutteetka süsepü Jericó!›

Naainjüin Josué otta na israeliitakana tü nümakat Jeʼwaa. Yüütüshii naya sünain naʼleeyatüin Jericó. Shia jaʼyaka nooʼuisanala otta shiiʼira tü suʼwakat paaʼa. Mmotkajasa maʼin na wayuu kepiakana Jericó. ¿Piʼrüin tü jiiku ishosü kachetakat sünain tü wentaanakat? ¿Jara kawentaanaseka shia? Shia Rahab, saainjüin tü namakat na ajayajüliikana. Paülüʼüsü shia namaa süpüshi sümaa kanain naaʼin tü alatakat.

Mapa soʼu 7 kaʼi, naʼleeyatapa akaratshitua Jericó, keeʼirasü natuma tü suʼwakat paaʼa, aʼwaatüshii na surulaatkana otta sujuttaka süsepü Jericó. Nümaka Josué: ‹Juʼuta naaʼin na wayuukana otta jaʼaja Jericó. Nnojoluinjatü jaʼajüin tü pülaatakat, tü oorokat, tü cobrekat otta tü kachuweerakat; chainjatü suluʼumüin tü aʼwaajüleekat›.

Nümaka Josué namüin na piamashiikana ajayajülii: ‹Jujuʼitira Rahab otta na süpüshikana suluʼujee tü nepiakat›. Kataka noʼu pansaa sümaa nanüiki na ajayajüliikana.