SÜPÜLAPÜNAA ouktuin David nüküjüin nümüin Salomón nukumajüinjatüin Maleiwa wanee piichi aʼwaajülee. Nukumajüin Salomón tia piichikat pienchipa juya nia sünain aluwatawaa. Akaratshi juya shiatapünaamüin nia sünain akumajaa. Wainma wayuu aʼyataaka sünain, kojutusü maʼin shia süka saainjünüin süka ooro otta pülaata.

Piamasü sütaüjia tü aʼwaajüleekat sümaa miyoʼuin shia suulia tü nukumajakat Moisés. Niʼiteʼerüin Salomón tü jurasükeetkat suluʼu tü sütaüjia miyoʼukat; tü wanee kasakalüirua eʼitaanüsü suluʼu tü wanee sütaüjiakat.

Aainjünüsü wanee miʼiraa kettaapa tü piichikat. Nüsapainkaka Salomón eeka tü aʼwaajüleekat, nümaka nümüin Jeʼwaa: ‹Nnojotsü keraain pümaa tü sirumatuʼukat shialeeka keraweein pümaa piichikat tüü. Paapaja wanüiki Maleiwa waashajaapa pümaa yaajee›.

Kettaapa nünüiki Salomón jotusü nutuma Maleiwa tü mürüt aʼajünajatkat otta chuwatuuisü suluʼupünaa tü aʼwaajüleekat nutuma. Tia shiiʼiyatüin talatüin nia sümaa tü aʼwaajüleekat otta nünüiki Salomón. Piichikat tia shiaipa eere nantüin na israeliitakana sünain aʼwaajaa Jeʼwaa.

Kakalia nuluwataain Salomón sümaa kekiin maʼin nia otta talatüshii na wayuukana nümaa. Mapa kasaatka nia sümaa jieyuu manoujuinsalü nünain Jeʼwaa. ¿Piʼrüin tü aʼwaajakat sümaleiwase suluʼu tü ayaakuaakat? Mapa anoujushi Salomón sünain tü namaleiwasekat natuma. ¿Jamüshi nia sutuma tia? Mojulaashi otta nnojoishii talatüin na wayuukana.

Jashichika Jeʼwaa nümüin Salomón, nümaka: ‹Nnojoleechi pia ayatüin sünain aluwatawaa, teʼitaajeechi wanee piiʼiraka. Taainjeerü tia nuluwataapa chi püchonkai. Akatsaʼa nnojoleerü tasütüin nuulia süpüshuaʼa tü wayuukalüirua›. Wekirajaa sünain tia.