AKÜJALAA 59
Aʼluwataashi David
SÜCHIKIJEE ouktuin Goliat, eʼikajaanüshi David eemüin Saúl nutuma Abner chi nekiipuʼukai na surulaatkana. Shikiipuʼuka nia nusurulaatse Saúl otta kepiaka nia nipialuʼu.
Naleʼejapa na surulaatkana süchikijee atkawaa namaa na filisteokana, neeʼirajaka na jieyuukana: ‹Oʼutushi saaʼin wainma wayuu Saúl akaisaʼa David wainmaleʼeya wayuu nuʼutaka aaʼin›. Nuchunjaka Saúl süka kojutuin maʼin David atumawaa. Nnojoishi achunjüin Jonatán chi nüchonkai Saúl süka aijiraain nia nümaa David. Makalaka aleewajiraainjanain naya waneepia.
Atüjüshi David atalejaa arpa otta anasü nümüin Saúl tü shiiʼirakat. Soʼu wanee kaʼi wanaa sümaa nütalejüin tü arpakat nujutaka Saúl wanee jatü nooʼomüin, nümaka: ‹¡Tatküinjachi David sünain süsepü tü piichikat!› Nülatiraka shia David. Mapa nutchejüin nia nüchikuaʼa. Naainjüin tia Saúl süka nuchunjüin. Nütüjaaipa aaʼu David eeinjatüin naaʼin.
¿Sotusü paaʼin kasa naapüinjatka Saúl nümüin chi eekai nuʼutuin naaʼin Goliat? Naapüinjatü wanee nüchon, naashin Saúl naapeerü Mical tü nüchonkat nümüin David nuʼutule saaʼin 100 filisteo. Nuluwataain nia süpüla ouktajachin natuma na filisteokana, nnojoika ouktuin nia. Naapaka Saúl tü nüchonkat nümüin David.
Soʼu wanee kaʼi nüküjüin Saúl nümüin Jonatán otta na aʼyataashiikana nümüin nuʼuteein naaʼin David. Nümaka Jonatán: ‹Nnojo puʼutuin naaʼin David. Nnojoishi aainjüin kasa mojusü pümüin, nükaaliinjüin pia, talatüsü paaʼin wanaa sümaa nuʼutuin naaʼin Goliat›.
Oonooshi Saúl nümüin chi nüchonkai. Pansaaka nünüiki süpüla nnojoluin nuʼutuin naaʼin David. Niʼyataaka David nüchikuaʼa nümüin Saúl. Soʼu wanee kaʼi wanaa sümaa nütalejüin Arpa, nujutaka Saúl wanee jatü nooʼomüin, nülatiraka shia David. Apünüintuairü naainjüin Saúl tia, nütüjaaipa aaʼu David nuʼluwataainjachin.
Nüntaka saʼwai nipialuʼumüin, nuluwataaka Saúl wayuuirua süpüla suʼutuin naaʼin, sütüjaa aaʼu Mical tü naainjüinjatkat chi süshikai. Sümaka nümüin David: ‹Puʼuna jooluʼu süpüla nnojoluin puʼutunuin aaʼin›. Sükaaliinjaka nia süpüla nuʼluwataain suluʼupünaa wanee wentaana. Ounjulaashi David soʼu 7 juya nuulia Saúl.
1 Samuel 18:1-30; 19:1-18.
Eesüjaʼa kamalainjeerüle pümüin aashajeʼeraa tüü
VIDEOKALÜIRUA
Niʼitaain naaʼin David nünain Maleiwa
Mayaainjeʼe kaainjalain David otta sülatüin kasa mojusü nümüin, nnojoishi ooʼulaain suulia aʼwaajaa Maleiwa. Shikirajüin waya tü nukuwaʼipakat David sünain ayatüinjanain waya waneepia nümaa Maleiwa.
