TÜ JINTUT naapaakat ajapü Jesús suluʼu tü ayaakuaakat 12 suuyase. Na pejekana sünain nia chi süshikai otta tü shiikat. ¿Pütüjaa aaʼu jamüshii talataka maʼin naya? Wekirajaa sünain tia.

Süshi tü jintutkat nia Jairo, kojutushi nia sutuma wayuu. Soʼu wanee kaʼi ayuuisü tü nüchonkat, nnojotsü aawalaain. Mojuka maʼin naaʼin Jairo sümaa tü nuʼwayuusekat sutuma oukteein tü jintutkat. Waneesüchon shia namüin. Nüsaajaka Jairo Jesús süka naapüin süchiki tü kasa pülasü naainjakat.

Nüntapa Jairo eemüin Jesús, wainma wayuu nüpüla, nülataka Jairo pasanainpünaa nanain otta nüsapainkaka nia nünainmüin Jesús, nümaka: ‹Ayuuisü maʼin tachon, puʼuna tepialuʼumüin süpüla piiyajüin shia›. Oʼunajachi Jesús naashin.

Wanaa sümaa noʼunuin ojunajiraashii na wayuukana süpüla narütkaain nünainmüin. Nüshaʼwalaaka Jesús, nümaka: ‹¿Jara epettaka tasheʼin?› Niyaawatüin Jesús anaipain nutuma wanee wayuu. ¿Jara epettaka nüsheʼin? Shia wanee jierü ayuuisü soʼu 12 juya. ¡Shipettüin nüsheʼin Jesús, anaka shia!

Anaka naaʼin Jairo sutuma tia, nütüjaa aaʼu mapüleein nümüin Jesús anain nutuma wayuu. Mapa nüntaka wanee wayuu, nümaka: ‹Ouktuipa tü püchonkat. Puuʼulaa suulia peenajüin Jesús›. Naapüin Jesús tia, nümaka nümüin Jairo: ‹Nnojo piyoʼujaain aaʼin. Aneerü shia›.

Nantapa nipialuʼumüin Jairo, aʼyalajüshii na wayuukana napüla. Nümaka Jesús: ‹Nnojo jiʼyalajüin, tü jintutkat nnojotsü ouktuin atunkusü neʼe›. Nasirajaka na wayuukana nüka Jesús süka natüjaain saaʼu ouktuin shia.

Nikerotaka Jesús eemüin tü jintutkat nümaa chi süshikai, tü shiikat otta apünüinshii aluwataaushii. Naapaaka Jesús sajapü tü jintutkat, nümaka: ‹Püchijiraa›. Süsoʼiraaka aaʼin tü jintutkat sünain süshaʼwalaain otta suwarairaain. Talataka maʼin chi süshikai otta tü shiikat sutuma tia.

Tü jintutkat nnojotsü shiain neʼe nüsoʼireʼerüin aaʼin Jesús. Chi palajaikai nüsoʼireʼerüin aaʼin nia süchon wanee wayuu kepiasü Naín. Mapa nüsoʼireʼerüin naaʼin Lázaro chi suwalakai María otta Marta. Nuluwataapa Jesús nüsoʼireʼerüinjatü saaʼin wainma wayuu. ¿Talatüinjatü waaʼin sutuma tia?