AASHAJAASHI Jesús nümaa wanee wayuu süpüla alinjatüin wayuu nüpüla. Nümaka chi wayuukai: ‹¿Jaralii na alinjanakana tapüla? Naashin chi wayuukai alinjatü nüpüla tü wanaawakat eʼirukuu otta anoujaka nümaa. Wekirajaa sünain tü nümakat Jesús nümüin.

Eeshi nikirajüle Jesús süka sukuwaʼipa tü kasa eʼnnakat sainküin mma. Jooluʼu ekirajüshi nüchiki wanee judío otta wanee samariajeʼewai. Watüjaaipa aaʼu nnojoluin anajiraain na judíokana namaa na samariajeʼewaliikana. Müsü nünüiki Jesús:

Eeshi wanee judío oʼunushi Jericómüin. Wanaaka nümaa wanee kaʼruwarannuu. Naʼluwajaka nünneetse sümaa nasheʼejüin nia. Ouktapünaaka nia napütüin.

Süchikijee tia, nülataka wanee sacerdote. Niʼraka chi wayuukai. ¿Kasa naainjaka? Alatüshi waneepünaa saʼata tü wopukot. Nülataka wanee leviita anoujushi maʼin. ¿Ashaʼwalaashi nia? Nnojo, nnojoishi nükaaliinjüin chi wayuukai. Piirakaa namüin suluʼu tü ayaakuaakat.

Piirakaa nümüin chi samariajeʼewai akaaliinjakai chi wayuu asheʼejünüshikai. Niiyajüin nülioʼu, nümaashi nia eemüin wanee piichi eeinjachire neemeraain otta naawalaain.

Kettaapa nutuma Jesús tü nüküjalakat, nümaka nümüin chi wayuu asakitkai nia: ‹¿Jarai saaʼin pümüin aika apüla chi wayuu asheʼejünüshikai? ¿Chi sacerdotekai, chi leviitakai, niataapa chi samariajeʼewaikai?›

Nümaka chi wayuukai: ‹Nia chi samariajeʼewaikai, anashi nia nümüin chi wayuu asheʼejünüshikai›.

Nümaka Jesús: ‹Puʼuna, paaʼinra tia namüin na wanee wayuukana›.

¿Anasü saaʼin pümüin nikirajia Jesús? Eesü süpüla watüjaain saaʼu wainma kasa anasü sünainjee tü nüküjakat Jesús suluʼu tü Wiwüliakat.