¿PIʼRÜIN tü jolotsü niiʼiyatakat chi wayuukai? Eweetüsü shia noʼunapa Jerusalénjee. Wüinpüjeʼewalii otta ekirajaashii naya sünain sukuwaʼipa tü jolotsükat. Suʼunirüin naya tü jolotsükat eemüin wanee wayuu kojutushi maʼin naashin.

Nantapa Jerusalénmüin, namaka: ‹¿Jalashi chi joʼuu aluwataainjachikai naaʼu na judíokana? Weʼrüin tü jolotsükat chejee Wüinpüjee, wantaka süpüla weeʼiyatüin nujutü nümüin›. Tü pütchikat «Judíos» shia wanee nanülia na israeliitakana.

Naapapa Herodes chi aluwataashikai süchiki tia, mojuka naaʼin. Nnojotsü nücheküin eeinjachin wanee naata aluwataai nüchikumüin. Nümaka namüin na sacerdotekana: ‹¿Jalainjachi jemein chi aluwataainjachikai?› Namaka nümüin: ‹Chainjachi Belén saashin tü Wiwüliakat›.

Nümaka Herodes namüin na wayuu wüinpüjeʼewaliikana: ‹Jüchajaa nüchiki chi joʼuukai. Jüntapa nünain, jaapira taya süpüla teeʼiyatüin nujutü nümüin›. ¡Nuʼutee aaʼinchi Herodes chi joʼuukai!

Oʼunusü tü jolotsükat Belénmüin napüleerua na wayuukana. Shiimalaaka eere chi joʼuukai. Nantapa na wayuukana eeshi napüla chi joʼuukai sümaa tü niikat. Nasülajaka korolo nümüin. Nüküjüin Jeʼwaa naʼlapüinruʼu nnojoluinjanain naleʼejüin eemüin Herodes. Noʼunaka noumainpaʼamüin suluʼupünaa wanee wopu naata.

Naapapa Herodes noʼunuin na wayuukana, jashichika maʼin nia. Nuʼutiraka naaʼin na tepichi piamakana otta na nnojoliikana piamain juya chaaʼaya Belén. Süpülapünaa tia naapirüin Jeʼwaa José. Nuʼunaka José Egiptomüin sümaa nüpüshi. Mapa naapapa José ouktuin Herodes nüleʼejaka Nazaretmüin eere miyoʼuin Jesús.

¿Jara chuwataka atuma tü jolotsükat? Nia Satanás. Nuʼutee aaʼinchi chi Nüchonkai Maleiwa. Nuʼunirüin na wayuu wüinpüjeʼewaliikana Jerusalénmüin süka nütüjaain saaʼu tü naainjeekat Herodes nüka chi joʼuukai.