PIIRAKAA sümüin tü kaleena sünainkat najapü Pablo otta chi surulaat aaʼinmajakai nia. Püreesashi Pablo Roma. Aʼatapajüshi nia tü aainjünajatkat nüka nutuma chi aluwataaikai Roma. Wanaa sümaa tia, antüshii wayuu analaashii nümüin.

Apünüin kaʼi süchikijee nüntüin Pablo Romamüin, achuntushi nia süpüla nantüin nekiipuʼu na judíokana nünainmüin. Nantaka kojuya judío. Naashajaaka Pablo namüin nüchiki Jesús otta nuluwataaya Maleiwa. Eeshii eeka nanoujuin otta eeka manoujuin.

Soʼu tü piamakat juya püreesaka oʼu Pablo aküjüshi nia pütchi namüin na surulaat aaʼinmajakana nia otta namüin na wayuu antakana nünainmüin. Sutuma tia, anoujushii noutku nüpüshi César chi aluwataaikai Roma.

¿Pütüjaa aaʼu jarai chi joyotokoi sünain ashajaa? Nia Timoteo. Püreesashinka nia sünainjee aküjaa süchiki Nuluwataaya Jeʼwaa. Mapa nüjütünaka achiki. Nüntaka süpüla nükaaliinjüin Pablo. ¿Pütüjaa aaʼu kasa nüshajaka? Wekirajaa sünain.

¿Sotusü paaʼin tü mmakat Filipos otta Éfeso suluʼuka tü Aküjalaakat 110? Eeshii wayuu anoujushii chaaʼaya nutuma Pablo. Ashajüshi karaloukta namüin sümaa püreesain nia. Tia karalouktakat suluʼusü tü Wiwüliakat. Éfeso otta Filipos sünülia. Nüküjüin Pablo nümüin Timoteo tü nüshajüinjatkat namüin na chakana Filipos.

Kamaneeshii maʼin na chakana Filipos nümüin Pablo. Akolojitshii nümüin otta naapaka Pablo tü analuʼutkat namüin. Epafrodito nia antitka tü nakolojirüinkat. Akaisaʼa nia ayuuipünaashi jee ouktataaichijee. Mapa anashi nia otta aleʼejüinjachi nuumainpaʼamüin. Nülüʼüjaka tü karaloukta nüshajalakat Pablo otta Timoteo Filiposmüin.

Sümaa püreesain Pablo ashajüshi nia waneeirua karaloukta suluʼusü tü Wiwüliakat. Wanee namüinjatü na anoujushii chakana Colosas. Makalaka Colosas sümünüin tü karalouktakat. Tü wanee nümüinjatü Filemón, chi naʼaleewain kepiakai Colosas. Tia aashajaasü nüchiki Onésimo, wanee nüchepchia Filemón.

Aʼluwataashi Onésimo Romamüin nuulia Filemón. Naapaka nüchiki Pablo püreesain nia Roma nünalaaka nümüin. Nüküjaka pütchi Pablo nümüin, nunoujaka. Mojuka naaʼin süka nuʼluwataain. Sutuma tia, ¿pütüjaa aaʼu kasa nüshajaka Pablo nümüin Filemón?

Nuchuntuin Pablo nümüin Filemón nnojoluinjatüin kanain naaʼin tü naainjakat Onésimo. Müshi Pablo: ‹Tajütüin pümüin Onésimo, püchepchiashi otta puwalaichipa nia›. Nüleʼejapa Onésimo nülüʼüjüin tü karaloukta namüinjatkat na chakana Colosas otta nümüin Filemón. ¡Talatakajasa maʼin Filemón süka nunoujuichipain chi nüchepchiakai wanaa nümaa!

Wanaa sümaa nüshajüin Pablo namüin na chakana Filipos otta nümüin Filemón, aküjüshi wanee pütchi anasü namüin. Müshi Pablo namüin na chakana Filipos: ‹Tajütüin jümüin Timoteo. Mapa anteechi taya jünainmüin›. Nüshajaka nümüin Filemón: ‹Yapa tapüla putuma wanee paü pipialuʼu›.

Nüjütünapa achiki Pablo waraittüshi nia eemüin na nuwalayuukana. Mapa püreesaka nia Roma nüchikuaʼa. Nütüjaaipa aaʼu nuʼutunajachin aaʼin. Nuluwataaka karaloukta nümüin Timoteo süpüla nüntüin, nümaka: ‹Oonooshi taya nümüin Maleiwa otta naapeerü kasa anasü tamüin›. Palitchon juya süchikijee ouktuin Pablo najaʼttirüin Jerusalén na romajeʼewaliikana.

Nuluwataain Jeʼwaa Juan sünain ashajaa waneeirua karaloukta suluʼu tü Wiwüliakat. Nüshajüin Alateetkat Mapeena tü aashajaakat süchiki tü alatajatkat mapeena. Wekirajaa sünain.