PIIRAKAA nümüin chi aapiee ojutatkai tü kaatsetkat. Nujuʼitirüin na aluwataaushiikana. Wekirajaa sünain jamüin püreesaka naya.

Alatüsü kojuya kaʼi süchikijee nuluwataanüin chi naaʼinkai Maleiwa nanainmüin na nikirajüinkana Jesús. Oʼunushi Pedro otta Juan aliika eemüin tü aʼwaajüleekat. Eeka wanee wayuu masaʼasai, eʼikajaanüshi nia chamüin süpüla nujulijüin nneerü naaʼu na wayuu antakana suluʼu tü aʼwaajüleekat. Niʼrapa Pedro otta Juan nujulijaka naaʼu. ¿Kasa naainjaka Pedro otta Juan?

Ashaʼwalaashii otta eirakaashii nümüin, nümaka Pedro: ‹Manneetsesai taya, akatsaʼa saaʼu nünülia Jesús püshaʼwalaa jee puwaraʼiraa› Naapaaka Pedro najapü chi wayuukai, nüshaʼwalamaataka sümaa nuwarairaain. Talatüshii otta ponusü naaʼin na wayuukana tia.

Nümaka Pedro: ‹Waainjüin tü kasa pülasükat nutuma chi naaʼinkai Maleiwa›. Nantaka na laülaashiikana naʼakajee na sacerdotekana. Jashichishii naya süka nüküjüin Pedro otta Juan süsoʼiraain naaʼin Jesús. Nataʼülaka otta napüreesajitka naya.

Waneemüin kaʼi noutkajaaka na laülaashiikana naʼakajee na sacerdotekana. Nantitka Pedro, Juan otta chi wayuu anakai natuma, namaka: ‹¿Kasa jaaʼinraka atuma tia?›

Shia nutuma nüpülain Maleiwa naashin Pedro. Nnojotsü natüjaain aaʼu na sacerdotekana tü naainjüinjatkat süka nnojoluin süpüla nounjulajüin tü kasa pülasükat. Naluwataaka naya süpüla nnojoluin nekirajüin nüchiki Jesús. Najütaka naya.

Ayatüshii na aluwataaushiikana ekirajüin nüchiki Jesús otta anain natuma na ayuuishiikana. Naapaka na wayuukana süchiki tü kasa naainjakat. Nantitka na ayuuishii chajanakana süʼütpünaa Jerusalén süpüla anain naya. Achunjüshii na laülaashiikana naʼakajee na sacerdotekana napüreesajitka na aluwataaushiikana.

Nujutatka saʼwai tü kaatsetkat wanee aapiee maʼaka piʼrüin suluʼu tü ayaakuaakat. Nümaka chi aapieekai: ‹Juʼuna eemüin tü aʼwaajüleekat, ayata jikirajüin wayuu›. Waneemüin kaʼi nasaajünapa na aluwataaushiikana, nnojoishii naya. Nousütunaka anain suluʼu tü aʼwaajüleekat neʼikajaanaka eemüin na sacerdotekana.

Namaka na laülaashiikana naʼakajee na sacerdotekana: ‹Waluwataain jia süpüla nnojoluin jaashajaain nüchiki Jesús. Akatsaʼa joutsü maʼin Jerusalén tü jikirajakat anain. Namaka na aluwataaushiikana: ‹Niainjachi woonooka amüin Maleiwa suulialeʼeya wayuu›. Ayataka naküjüin pütchi. ¡Anasü maʼin tü naainjakat!