1, 2. ¿Jamüshi aika püpüla Je’waa?

¿AISHI püpüla Maleiwa? Eesü aa pümüle sümaa emetuluin pünüiki paapüitpale paaʼin nümüin. Watüjaa aaʼu alinjachin wapüla Je’waa süka alin waya nüpüla. Maʼaka sümüin tü Wiwüliakat, «aishi wapüla chi Maleiwakai süka alin waya nüpüla palajana» (1 Juan 4:19).

² Wainma kasa naainjaka Je’waa süpüla niiʼiyatüin alin waya nüpüla. Naapüin wamüin tü Mmakat süpüla kepiain waya suluʼu otta tü kasa choʼujaakat süpüla katüin woʼu (Mateo 5:43-48). Jee müsia, naaʼinmajüin tü wanoulakat. Makalaka naapüin wamüin tü Wiwüliakat, nüküjüin eein süpüla waashajaain nümaa sümaa watüjaain saaʼu naapeerüin wanüiki otta nükaaliinjeenain waya nükajee chi naaʼinkai (1 Juan 5:14, 15; Lucas 11:13). Akatsaʼa, niiʼiyatüin alin maʼin waya nüpüla süka nuluwataain chi Nüchon aikai maʼin nüpüla süpüla naakajirüin waya suulia kaainjalaa jee ouktaa. ¡Aikanache maʼin waya nüpüla Je’waa! (Juan 3:16; Roma 5:8.)

3. (1) ¿Kasa waainjüinjatka süpüla ayatüin alin wapüla Maleiwa? (2) ¿Kasa wasakirüinjatka anain? ¿Jalasü wousütüin tü süsouktiakat?

³ Keeʼireesü naaʼin Je’waa alin nia wapüla waneepia. ¿Wounteerü shia? Wounteerü anale watuma  sukuwaʼipa tü kasa waainjakat. Müsü tü Wiwüliakat wamüin: «Ayata alin jüpüla Maleiwa, sümaa jaʼatapajüin [...] katüinjatüin joʼu waneepia» (Judas 21, TNM). Tü pütchikat «ayata» shiiʼiyatüin eein tü waainjüinjatkat süpüla ayatüin alin wapüla Je’waa. Shiimain, weeʼiyatüinjatü süka tü kasa waainjakat alin nia wapüla. Makalaka anain maʼin wasakirüle waaʼin: «¿Kasa taainjüinjatka süpüla teeʼiyatüin alin tapüla Maleiwa?». Süpüla watüjaain saaʼu waashajeʼera tü nümakat chi aluwataaushikai Juan: ‹Waaʼinrüle tü nuluwataakat anain chi Maleiwakai, shiimüin alin nia wapüla. Je tü nuluwataakat anain, nnojotsü isain wachiki› (1 Juan 5:3). Süka weeʼiyateein  alin maʼin wapüla Maleiwa, wekirajaa sünain jamaluʼuluin maʼin tü nümakat Juan.

4, 5. ¿Jamüsü süpüla sükumajaain suluʼu paaʼin alin püpüla Maleiwa?

⁴ Naashin Juan ‹shiimainre alin wapüla Maleiwa waaʼinrüin tü nuluwataakat anain waya›. ¿Sotusü paaʼin joujatüin sükumajaain suluʼu paaʼin alin püpüla Maleiwa?

⁵ Soto paaʼin motsomüin kaʼikat tia. Wanaa sümaa pikirajaain sünain tü shiimainkat nüchiki Je’waa otta tü naainjüinjatkat, kooʼomüinsü maʼin pünoula nünain. Pütüjaa aaʼu kaainjaraliin waya wapüshuaʼa, shia maka kaʼyatüin pia paala nuulia Maleiwa. Mayaapejeʼe müin shia, pütüjaa aaʼu eein süpüla katüin poʼu waneepia nükajee Cristo otta pümaʼanain tü amülouikat nutuma Adán (Mateo 20:28; Roma 5:12, 18). Otta müsia, pütüjaa aaʼu nuluwataain Je’waa chi Nüchon aikai maʼin nüpüla süpüla ouktüin nia paaʼu. Talatüsü maʼin paaʼin sutuma tia, makalaka alin püpüla Je’waa (1 Juan 4:9, 10).

6. ¿Kasa weeʼiyataka aka shiimainre alin wapüla Maleiwa? ¿Kasa paainjüitpaka süka alin püpüla Maleiwa?

⁶ Akatsaʼa tia, nnojotsü shiiʼiyatüin alin maʼin püpüla Maleiwa. ¿Jamüsü? Shiimainre alin wapüla Maleiwa nnojoishi kamalainjachin neʼe nia wamüin, nnojoishii müinjanain neʼe waya: «Aishi tapüla Je’waa». Maʼaka saaʼin tü wanoulakat, shiimainre alin wapüla nia weeʼiyatüinjatü süka tü kasa waainjakat (Santiago 2:26). Aire wapüla wanee wayuu waainjeein tü kasa talatakat atuma naaʼin. Tia shia tü alatakat pümüin. Aipa maʼin püpüla chi Püshi iipünaajachikai, paainjeein tü kasa talatakat atuma naaʼin otta puwoutisaajüin süpüla  püküjülin pütchi nüchiki Je’waa. Paainjüitpale shia, shiimain alin püpüla Je’waa otta waneepieein pia nümaa. Sutuma tia, paapüin paaʼin nümüin Maleiwa süpüla paainjüin tü keeʼireekat naaʼin waneepia otta piiʼiyatüin shia wanaa sümaa puwoutisaajüin (Roma 14:7, 8). Akatsaʼa süpüla wekeraajüin tü wamakat eesü wanee kasa waainjüinjatka naashin Juan.

7. Püküja soʼutku tü nuluwataakat anain waya Maleiwa. ¿Kasa waainjüinjatka süpüla waaʼinrüin shia?

⁷ Naashin Juan aire wapüla Maleiwa ‹waaʼinrüin tü nuluwataakat anain waya›. ¿Kasa tü nuluwataakat anain waya? Wainma tü süküjakat tü Wiwüliakat. Soʼutku tia shia niyouktüin Je’waa epeʼruwaa, amaʼüjirawaa akuwaʼipaa, kamaleiwaseyawaa, aʼluwajaa otta aküjaa alawaa (1 Corinto 5:11; 6:18; 10:14; Éfeso 4:28; Colosas 3:9). Süpüla waaʼinrüinjatüin tü nuluwataakat anain waya Maleiwa pansaainjatü wakuwaʼipa sümaa tü sümakat tü Wiwüliakat.

8, 9. Nnojorüle süküjüin tü Wiwüliakat anale jee mojule wanee kasa, ¿kasa waainjüinjatka süpüla watüjaain saaʼu tü nüchekakat Je’waa süpüla waainjüin? Piʼitaa wanee shiyaawase.

⁸ Süpüla talatüin Je’waa watuma nnojotsü waaʼinrüinjatüin neʼe tü ashajünakat suluʼu tü Wiwüliakat. Nnojotsü müliain waaʼin nutuma Je’waa sükajee niʼitaain wapüleerua süpüshuaʼa tü waainjüinjatkat. Wainma kasa kanainpünaaka waya weinshi, akatsaʼa eesü tü nnojotkat süküjüin maʼin achiki tü Wiwüliakat anale jee mojule shia. ¿Kasa waainjüinjatka süpüla watüjaain saaʼu talatüle Je’waa sümaa tü kasa waainjüinjatkat? ¿Jalasü wousütüin jamüin nünüiki Maleiwa süchiki tü kasakalüirua? Suluʼu tü Wiwüliakat. Wekirajaale sünain, watüjaa aaʼu tü kasa anakat jee tü mojukat nümüin Je’waa  (Roma 12:9; Proverbios 6:16-19). Sutuma tia, watüjaajeerü aaʼu tü akuwaʼipaa anakat nümüin. Wanaa sümaa watüjaain saaʼu tü nukuwaʼipakat Je’waa sünain aainjaa wanee kasa, mapüleejeerü wamüin watüjaain saaʼu anale jee mojule nümüin tü waaʼinrüinjatkat. Müle shia, wayaawateerü ‹tü nüchekakat Je’waa› süchiki wanee kasa, jaʼitairü nnojoluin süshajünüin suluʼu tü Wiwüliakat (Éfeso 5:17).

⁹ Weʼitaa wanee shiyaawase. Nnojotsü ashajünüin suluʼu tü Wiwüliakat mojuin wanajüle peliikula otta waneeirua kasa eere sümaʼüjiraain otta sütkaain maʼin wayuu. Akatsaʼa, ¿choʼujaasü süküjünüin maʼin wamüin mojuin shia? Watüjaaitpa aaʼu tü nümakat Je’waa. Saashin tü Wiwüliakat «üttüsü naaʼin sünain wayuu eeka sücheküin tü atkawaakat» otta ‹kasalajaneerü nütüma naainjala chi eekai nümaʼüjaain sümaa wayuu nnojotka nuʼwayuusein otta chi aʼluwajiraakai nukuaippa› (Salmo 11:5, TNM; Hebreokana 13:4). Wanaa sümaa wasakirüin waaʼin sünain pütchikat tia watüjaa aaʼu tü nüchekakat Je’waa. Makalaka nnojoluinjatüin wanajüin tü kasa nüʼürülakat Je’waa ojuʼitaka suluʼupünaa telewisoot. Naashin na wayuukana nnojotsü mojuin tia. Akatsaʼa, anasü nümüin Je’waa wayouktüle shia. *

10, 11. ¿Jamüshii woonooinjanaka waneepia nümüin Je’waa? ¿Jamüinjatü sukuwaʼipa watuma?

¹⁰ ¿Jamüshii woonooka maʼin sümüin tü nuluwataakat anain Maleiwa? Nnojotsü shiain suulia mojuin wakuwaʼipa otta nnojoluin süsalain waya waainjala (Galacia 6:7, TNM). Oonooshii waya nümüin Je’waa süpüla weeʼiyatüin nümüin alin maʼin nia wapüla.  Maʼaka aneein na tepichikana namüin nashi jee nei, müshiʼiya waya aneeshii nümüin Je’waa (Salmo 5:12). Washi nia otta aishi maʼin wapüla. Talatüshii maʼin waya wanaa sümaa watüjaain saaʼu ‹anain nümüin Je’waa› wakuwaʼipa (Proverbios 12:2, TNM).

¹¹ Sutuma tia, nnojoishii waya aʼyataainjanain nümüin Maleiwa mojusheeka otta wachuntüin nümüin tü keeʼireekat waaʼin palajana. * Nnojotsü waneeküin tü pütchi woonooinjatkat amüin sutuma mapüleein shia süpüla waainjüin. Suulia tia, ‹oonooshii waya süka süpüshuaʼa waaʼin› (Roma 6:17). Müshii waya maʼaka naaʼin chi eeʼirajüikai: «Kojutüsü tamüin tü puluwataakat anain» (Salmo 119:47, TNM). Shiimain, oonooshii waya nümüin Je’waa süka waaʼin. Wayaawatüin niain neʼe woonooinjachin amüin waneepia, nüchuntüin shia wamüin sümaa nnojoluin waʼyounalaain süpülapünaa waainjüin shia (Deuteronomio 12:32). Meeshii waya maʼaka naaʼin Noé, oonooka nümüin Maleiwa soʼu wainma juya, niiʼiyatüin mayaa alin maʼin nia nüpüla. Müle shia watuma, meerü pütchi wachiki maʼaka tü münakat nüchiki: «Oonooshi Noé sümaa nünüiki chi Maleiwakai sünain naaʼinrüin süpüshuaʼaya tü nuluwataakat anain» (Génesis 6:22).

12. ¿Kasa talataka maʼin atuma naaʼin Je’waa?

¹² ¿Jamüsü naaʼin Je’waa woonoole nümüin süka waaʼin? Talatüsü naaʼin saashin tü Wiwüliakat (Proverbios 27:11). ¿Eesüche süpüla watalateʼerüin naaʼin chi Aluwataakai saaʼu kasa süpüshuaʼa? Aa. Wekirajaa sünain jamüsü eeka süpüla waainjüin tia. Nükumajüin  waya Je’waa süpüla waneeküin tü waainjüinjatkat. Sutuma tia, eesü süpüla waneeküin woonooin jee nnojoluin woonooin nümüin (Deuteronomio 30:15, 16, 19, 20). Wanaa sümaa waaʼinrüin tü nuluwataakat anain waya süka alin nia wapüla süka süpüshuaʼa waaʼin, talatüsü maʼin naaʼin watuma (Proverbios 11:20). Otta müsia waneeküin tü akuwaʼipaa anakat maʼin.

13, 14. ¿Jamüsü ‹nnojotka isain wachiki tü nuluwataakat anain Je’waa›? Piʼitaa wanee shiyaawase.

¹³ Nüküjüin chi aluwataaushikai Juan wanee pütchi anaka atuma waaʼin: ‹Tü nuluwataakat anain [Je’waa] nnojotsü isain wachiki› (1 Juan 5:3). Nnojotsü nüchuntüin wamüin kasa kapüleesü otta nnojotka anain. Mayaapejeʼe nnojoluin lotuin maʼin wakuwaʼipa eesü süpüla waainjüin tü nuluwataakat anain waya.

¹⁴ Weʼitaa wanee shiyaawase. Nüchuntüle pümüin wanee paʼaleewain pükaaliinjüin nia sünain okolojowaa, wainma tü kaaja apataanajatkat, eesü eeka jamaamain otta jawatüin maʼin anaka süpüla nalüʼüjiraain piamashii wayuu. Nüküjüin pümüin jaralüin tü kaaja püpataainjatkat. Nnojoleerü nüchuntüin pümüin püpataain tü jawatakat maʼin süka nnojoluin nücheküin peewaain sutuma. Müshia chi Wamaleiwase aipüraikai, nnojotsü nüchuntüin tü isakat wachiki (Deuteronomio 30:11-14). Nnojoishii nuluwataain waya sünain aainjaa kasa kapüleesü. Nütüjaa aaʼu tü eekat süpüla waainjüin süka ‹niʼraajüin maʼin tü wakumajiakat ooʼulaka sotusü naaʼin sümamülain mma waya› (Salmo 103:14, TNM).

15. ¿Jamüsü watüjaaka saaʼu süpülajatüin anain wakuwaʼipa tü nuluwataakat anain Je’waa?

 ¹⁵ Tü nuluwataakat anain Je’waa nnojotsü isain wachiki, süpülajatü neʼe anain wakuwaʼipa (Isaías 48:17). Müshi Moisés namüin na israeliitakana ‹naainjüinjatüin süpüshuaʼa tü nuluwataakat anain Maleiwa otta mmoluwaain naya neema›. Süchikijee, nüküjüin jamüin naainjüinjatkat tia: «Süpüla[jatü] anain wakuwaʼipa waneepia, süpüla ayatüin katüin woʼu» (Deuteronomio 6:24, TNM). Müshiʼiya waya, watüjaa aaʼu süpülajatüin anain wakuwaʼipa tü nuluwataakat anain Maleiwa otta talatüin waya waneepia. Shiimain tia, ¿jamüsü? Süka nümaʼanajeejatüin shia Je’waa, nütüjaa aaʼu tü anakat wapüla süka kekiishaatain maʼin nia (Roma 11:33). Otta müsia, aipürai nia (1 Juan 4:8). Tia, shia wanee nukuwaʼipa Je’waa jaʼyaka maʼin nünain, eesü shia sünain tü nümakat, tü naainjakat otta tü nuluwataakat anain.

16. Mayaapejeʼe eejiraain waya suulia washatüin tü saainjakat tü manoujüinsatkalüirua otta waainjeein maʼin kasa mojusü, ¿jamüshii eeka süpüla woonooin nümüin Maleiwa?

¹⁶ Tia nnojotsü maluʼuluin mapüleein oonowaa nümüin Maleiwa. Eejiraainjana waya suulia washatüin tü saainjakat tü manoujüinsatkalüirua süka ‹niain aluwataain saaʼu chi Yolujaakai› (1 Juan 5:19). Otta müsia, sutuma waainjeein maʼin kasa mojusü, wachecherüinjatü waaʼin suulia süka nnojoluin waainjüin sutuma tü nuluwataakat anain Maleiwa (Roma 7:21-25). Akatsaʼa eesü süpüla wakanajüin aire wapüla Maleiwa. Aapüshi Je’waa kasa anasü namüin na oonookana nümüin süka alin nia napüla. Naapüin «chi Naaʼinkai [...] sümüin wayuu eekai jüüjüüin nümüin» (Aluwataaushikana 5:32). Nutuma chi naaʼinkai Maleiwa eesü suluʼu wakuwaʼipa  akuwaʼipaa anasü akaaliinjaka waya süpüla ayatüin woonooin nümüin Maleiwa (Galacia 5:22, 23).

17, 18. (1) ¿Kasa wekirajaainjatka sünain karalouktakat tüü? ¿Kasa jülüjüinjatka waaʼin wekirajaapa sünain? (2) ¿Kasa wekirajaainjatka anain suluʼu tü wanee ekirajaayakat?

¹⁷ Sünain karalouktakat tüü, wekirajaajeerü anain tü pütchi nümakat Je’waa, tü nuluwataakat anain waya otta müsia waneeirua pütchi eeʼiyataka tü nüchekakat süpüla waainjüin. Wekirajaapa sünain tia, jülüjüinjatü waaʼin waneeirua kasa. Palajana, nnojotsü müliain waaʼin nutuma Je’waa süpüla woonooin sümüin tü pütchi nümakat otta tü nuluwataakat anain; keeʼireesü naaʼin waainjüin shia süka waaʼin. Tü wanee, keeʼireesü naaʼin Je’waa anain wakuwaʼipa maaʼulu otta katüin woʼu waneepia mapeena. Otta müsia, wayaawatüinjatü woonoole nümüin Je’waa süka süpüshuaʼa waaʼin, weeʼiyatüin nümüin alin maʼin nia wapüla.

¹⁸ Süpüla watüjaain saaʼu anale jee mojule wanee kasa, naapüin Je’waa wamüin tü waaʼinkat. Wekirajüinjatü shia süpüla anain wakuwaʼipa sutuma. Wekirajaajeerü anain tia suluʼu tü wanee ekirajaayakat.