Namüin napüshuaʼa na aikana apüla Je’waa:

Müshi Jesús: «Jiyaawateerü aaʼu tü shiimainkat süpüla jujuittüinjanain sütüma suulia achepchiaa» (Juan 8:32). ¡Anasü maʼin tia pütchikat! Eesü süpüla watüjaain saaʼu tü shiimainkat mayaapejeʼe wainmain kasa mojusü, süpülapünaa ‹sajaʼttüin tü kasakat süpüshuaʼa› eere jouluin aküjaa alawaa (2 Timoteo 3:1). Sotusü waaʼin talatüin maʼin waya süka watüjaain saaʼu tü shiimain suluʼukat tü Wiwüliakat. ¡Anashaatasü maʼin tia!

Nnojotsü watüjaainjatüin neʼe saaʼu tü shiimainkat otta waküjüin süchiki, choʼujaasü maʼin waainjüin shia. Shiimain, ayatüinjachi alin wapüla Maleiwa. Akatsaʼa, ¿kasa waainjüinjatka süpüla tia? Nüküjüin tia Jesús, wanee ai süpülapünaa ouktüin nia, müshi namüin na nuluwataainkana: ‹Jaainjüle tü taluwataakat anain, ayateechi alin taya jüpüla, maʼaka taainjüin tü nuluwataakat anain chi Tashikai otta ayatüin alin tapüla nia› (Juan 15:10, TNM).

¿Kasa naainjaka Jesús süpüla ayatüin alin nüpüla Maleiwa? Naainjüin tü nuluwataakat anain. Müsia tü waainjüinjatkat. Süpüla ayatüin alin wapüla Maleiwa waainjüinjatü tü sümakat tü Wiwüliakat sünain süpüshuaʼa tü waainjakat. Pansaasü maʼin süküjia nutuma Jesús soʼu aikat tia: «Jütüjaale saaʼu kasakalüirua tüü, talateena jia jaainjüle shia» (Juan 13:17, TNM).

Keeʼireesü maʼin waaʼin sükaaliinjüin waya karalouktakat tüü süpüla ayatüin waainjüin tü sümakat tü Wiwüliakat otta sükajee tia ayateechi ‹alin wapüla Maleiwa, sümaa waʼatapajüin katüinjatüin woʼu waneepia› (Judas 21, TNM).