Darío nünülia chi aluwataakai saaʼu Babilonia. Nütüjaa aaʼu lotuin nukuwaʼipa Daniel, müshijeseʼe niʼitaain nia süpüla laülaain naaʼu na wayuu kojutukana maʼin atumawaa. Naya wayuukana, achunjashii otta noʼutee aaʼinchi Daniel. Natüjaa aaʼulu nuʼuraajawalin Daniel nümüin Jeʼwaa apünüintua kaʼiwai. «Laülaashikalee, anasü püikaleʼerüle wanee pütchi süpüla piainjachin neʼe aʼwaajünüin pümüiwaʼa. Eerejeʼe wanee wayuu moonooinka sümaa tia pütchikat, anashi nujutunule suluʼu tü ishi kaluʼukat wasashi», namaka nümüin Darío. Anashiisü nümüin Darío tia pütchikat otta naainjaka tia namakat.

Nütüjaapa saaʼu Daniel süikaleʼennüin tü pütchikat, oʼunushi nia nipialuʼumüin. Nüntapa nipialuʼumüin, nüsapainkaka nia sünain oʼuraajaa nümüin Jeʼwaa, peje sünain tü wentaanakat. Nekerojooko na kachunraliikana nipialuʼumüin Daniel otta neʼraka nia sünain oʼuraajaa. Awataamaatüshii naya eemüin Darío sünain maa nümüin: «Moonooinsai Daniel sümaa tü pümakat. Ichaa nia oʼuraajüin nümüin chi Nümaleiwasekai apünüintua süpüla kaʼikat». Aishi Daniel nüpüla Darío otta niyoutuin nuʼutunuin aaʼin. Siraasü kaʼi naaʼu Darío sünain nüchajaain sukuwaʼipa süpüla nükaaliinjain Daniel, isapejeʼe nüchiki süka nnojoluin süpüla nuʼwanajeʼerüin wanee pütchi eeka süikaleʼennüin. Sutuma mepin tia, nuluwataain wayuu süpüla nujutunuin Daniel suluʼu tü ishi kaluʼukat wasashi.

Soʼu aikat tia, shapaasü maʼin naaʼin Darío naaʼu Daniel otta matunkuinsai nia. Waneemüin kaʼi,  awataamaatüshi Darío eejachire nujutunuin Daniel. Niirakaaka Darío suluʼupünaa tü ishikat sünain maa: «¡Danielkalee! ¿Nükaaliinjüinya pia chi Pümaleiwasekai?».

Naapaka Darío nünüiki Daniel sünain maa: «Nuluwataain Jeʼwaa wanee aapiee süpüla naaʼinmajüin taya suulia wasashi otta nnojoishi jamajüin taya». Talatüshi maʼin Darío saaʼujee tia otta nuluwataaka wayuu süpüla nojuʼitirüin Daniel suluʼujee tü ishikat. Nnojoishi jamajüin Daniel. «Jujuta suluʼumüin tü ishi kaluʼukat wasashi na eʼrüliikana wayumüin nümüin Daniel», nümaka chi aluwataaikai. Nojutunaiwaʼaya suluʼu tü ishikat, shikajaamaatüin naya tü wasashikalüirua.

Nümakalaka Darío: «Tamüshii paala jia jüpüshuaʼa, kojutuinjachi jümüin chi Nümaleiwasekai Daniel. Jiʼrüichipa nia sünain naaʼinmajüin Daniel suulia tü wasashikalüirua».

¿Jama piakai? ¿Oʼuraajüshiche pia waneepia nümüin Jeʼwaa maʼaka naaʼinrüin shia Daniel?