Soʼu wanee ai, aʼlapüjaashi chi aluwataaikai Nabucodonosor. Matunkuinsai nia süka nütüjaweein saaʼu kasapülajatüin tü nüʼlapüinkat. Neenajirüin na ooʼulaküliikana. «Jüküja tamüin kasapülajatüin tü taʼlapüinkat», nümaka namüin. Nasoutaka nümüin: «Aluwataashikalee, püküja wamüin kasain püʼlapüjaain amaa». «¡Nnojottaa! Jüküja tamüin kasain taʼlapüjaain amaa. Nnojorüle jüküjain tamüin, toʼuteena aaʼin jia», nümaka Nabucodonosor neʼipajee. «Shia anaka aluʼu püküjale wamüin tü püʼlapüinkat, waküjeetka pümüin kasapülajatüin shia», namaka na ooʼulaküliikana nümüin. Nusoutakalaka namüin: «Jimeejee aaʼinchi taya. Jüküja jümaala kasain taʼlapüjaain amaa». «Nnojoishi eein wanee wayuu eekai süpüla naaʼinrüin tü puchuntakat», namaka nümüin.

Jashichishi maʼin Nabucodonosor, nuluwataaka noʼutunuin naaʼin napüshuaʼa na ooʼulaküliikana otta na kekiikana maʼin. Naʼaka naya wayuu oʼutunajanakana aaʼin, eejachi Daniel, Sadrac, Mesac otta Abednego. «Jiatta paa aluwataashikai, waküjeerü pümüin mapa kasain tü püʼlapüjaakalü amaa», nümaka Daniel. Niasaʼa Daniel otta na apünüinshiikana naʼaleewainyuu achuntushii naya kaaliinwaa nümüin Jeʼwaa. ¿Kasache naaʼinraka Jeʼwaa napüleerua?

Nüküjaka Jeʼwaa nümüin Daniel kasain nüʼlapüjaain amaa Nabucodonosor jee kasapülajatüin shia. Waneemüin kaʼi süchikijee tia, arütkaashi Daniel nünainmüin wanee wayuu aʼyataai nümüin chi aluwataaikai nümaka nümüin: «Nnojo juʼutuin naaʼin na wayuu kekiikana maʼin, taküjeerü nümüin chi aluwataaikai kasapülajatüin tü nüʼlapüinkat». Oʼuninnüshi Daniel nutuma chi wayuukai eemüin Nabucodonosor. Nümaka Daniel: «Nüküjain pümüin Maleiwa tü alatajatkat mapa. Anuu tü püʼlapüjaakalü amaa: Piʼrüin niyaakua wanee wayuu miyoʼu maʼin. Tü nikiikat aainjuushi süka ooro, tü nuʼluuwainkat otta tü nütünakat, aainjuushi süka pülaata, tü nüleʼekat sünainmüinreʼeya tü nüpüʼükat, aainjuushi süka cobre. Otta tü nüsaʼakat, aainjuushi süka kachueera. Tü nuuʼuikat sümaa tü süpachirakat nuuʼui, aainjuushi süka kachueera sümaa pootshi. Sujuʼitaka wanee ipa sünainjee wanee uuchi, shiʼitaka nuuʼui chi  wayuu piʼrakai. Ajaʼttaleesia shia. Sülüʼüjain tü joutaikat tü sükalirakat. Shiasaʼa tü ipakat, akumajaasü suluʼu uuchin miyoʼu maʼin saaʼu mmakat süpüshuaʼa».

Nümaka Daniel nümüin Nabucodonosor: «Nikii chi wayuu piʼrakai aainjuushika süka ooro, shiyaawasesü puluwataaya. Jee müsia tü niʼipa aainjuushikat süka pülaata, shiyaawasesü wanee aluwataaya eejeetka püchikijee . Otta tü aainjuushikat süka cobre, shiyaawasesü wanee aluwataaya aluwataainjatka saaʼu mmaka süpüshuaʼa. Jee tü aluwataaya eejeetkat süchikijee tia, meerü aka saaʼin tü kachueerakat ichekat süpüla ashataanaa. Tü nuuʼuikat sümaa tü süpachirakat nuuʼui, aainjuushika süka kachueera sümaa pootshi, shiyaawasesü wanee aluwataaya nnojoleetka paaʼinwain. Tü ipa ojuʼitakat sünainjee wanee uuchi, shiyaawasesü Nuluwataaya Maleiwa. Sajaʼttireerü süpüshuaʼa tü aluwataayakalüirua otta eejeerü shia waneepia».

Nuʼwachiraaka Nabucodonosor nümülatuʼu Daniel sünain maa: «Nüküjüinya pümüin chi Pümaleiwasekai tü taʼlapüinkat, nnojoishi eein wanee maleiwa maʼaka naaʼin niakai». Nnojoishi oʼutunuin aaʼin Daniel, nüneeküin joo nia Nabucodonosor süpüla laülaainjachin naaʼu na wayuu kekiikana maʼin jee süpüla niʼipajanainjachin nia sünain aluwatawaa saaʼu Babilonia. ¿Aashin naapüin Jeʼwaa nünüiki Daniel wanaa sümaa nuchuntuin kaaliinwaa?