Nuuntuin Jesuu niiyajüin na ayuuishiikana otta nüsoʼireʼerüin saaʼin wayuu outusü. Jee müsia niimaleʼerüin wawai otta juya. Wanaa sümaa chajachin oʼuraajüin Jesuu saaʼu tü uuchikat, niʼrüin wattajee sukumajaain wanee wawai shiroku tü palaa kanüliakat Galilea, müliashii maʼin na aluwataaushiikana sutuma tü wawaikat. Nüshakataka Jesuu saaʼujee tü uuchikat jee nuʼunaka nanainmüin na aluwataaushiikana sümaa waraitüin nia sooʼopünaa tü palaakat. Neʼrapa wanee wayuu waraitüin sooʼopünaa tü palaakat, mmotshii maʼin naya. «Nnojo mmoluin jia, taya tayakai», nümaka Jesuu namüin.

«Senyotkalee, müleka shiimainreje piain weʼrüin, anashi peenaküle taya süpüla tantajachin pünainmüin», nümaka Pedro. Nusoutaka Jesuu nümüin: «Anakajaʼa, jalaichi pümaala». Nüshakataka joo Pedro suluʼujee tü anuwakat sünain waraitüin sooʼopünaa tü palaakat nünainmüin Jesuu. Mmotkalaka Pedro niʼrapa tü wawaikat. Nuʼttakalaka sünain nimerolo nimerolo nümüin shirokumüin tü palaakat. «Jalia taya Senyotkalee», nümaka Pedro sümaa nuʼwaatüin. Niyurulaka nütüna Jesuu sünain naapaain Pedro. «Pia matsüinkai anoula, ¿jamüshi nnojoika püchecherüin paaʼin sünain anoujaa tanain?», nümakalaka Jesuu nümüin.

Noʼotoopa Jesuu nümaa Pedro suluʼumüin tü anuwakat, eimalaasü tü wawaikat. Talatakajasaʼa maʼin naaʼin na aluwataaushiikana soʼu tia. «Shiimainjaʼa sünain piain chi Nüchonkai Maleiwa», namaka.

Kojuyatua niimaleʼerüin Jesuu wanee wawai otta tü palaakat. Soʼu wanee kaʼi, oʼunushi Jesuu namaa na aluwataaushiikana waneemüin saʼata tü palaakat, atunkushi Jesuu suluʼu tü anuwakat sümaʼinruʼu suʼunuin shirokupünaa tü palaakat. Süntaka wanee wawai nanainmüin otta shipirajaweeka wüin tü anuwakat sutuma. «Ekirajüikalee, püchijiraa maala. Ouktüshii taa waya», namaka na aluwataaushiikana nümüin Jesuu. Nüshaʼwalaaka Jesuu jee nüchiajaaka tü wawaikat sünain müin nünüiki: «Jimata pia». Eimalaa müsia shia sutuma nünüiki. «Matsüinsat junoula», nümaka Jesuu namüin. «¿Jaraikai wayuukai chii, kacheʼekai amüin wawai ooʼulaka tü palaakat?», namaka na aluwataaushiikana. Nayaawata aaʼu na aluwataaushiikana neʼitaainjatüin naaʼin nünain Jesuu otta nnojoliinjanain mmoluin naya.