Oʼunushi Jesuu namaa na aluwataaushiikana eemüin tü uuchi kanüliakat Olivos, alatüshii naya eepünaa wanee patajatshii Cedrón münüsü. Chajana naya süseʼeruʼu aika jee jotoshootoshi chi Kashikai soʼu tia. Nuʼunaka Jesuu namaa na aluwataaushiikana wünaʼapümüin eere tü kanüliakat Getsemaní. «Anakajaʼa müleka yaale jia sümaa eein jaaʼin», nümaka Jesuu namüin. Nuʼunaka Jesuu nümüiwaʼa mamüin aka tüsa sünain achuntaa nümüin Maleiwa. Nüsapainkaka nia sümaa mojuin maʼin naaʼin sünain nümüin nümüin Jeʼwaa: «Anakajaʼa shiale paaʼinrüin tü püchekakat tapüleerua». Nüntaka wanee aapiee nümaʼanajeejachi Maleiwa süpüla nükatsüinrüin naaʼin. Süchikijee tia, nürütkaaka Jesuu nanainmüin apünüinshii aluwataaushii eere natunkajaʼattaain nüpüla. «¿Jamüshii jia jutunkaka maʼin? ¿Jamüshii jia nnojoliika eejüin jaaʼin? Antüitpa takalia süpüla taapünüinjachin ekii sajapuluʼu taʼünüü», nümaka namüin.

Wanaa sümaa yootuin Jesuu, antüshi Judas sümaa wainma wayuu wunuʼumaaka otta chajaruutamaaka. Nütüjaa aaʼu Judas jalainjanain naya nüpüla süka kojuyatuain nuʼunuin nümaa Jesuu chaa Getsemaní. Jee Judas, nüküjain namüin na surulaatkana wopuluʼu jamüinjatüin sukuwaʼipa süpüla natüjaain saaʼu jaralin Jesuu. Nürütkaaka jooluʼu Judas nünainmüin Jesuu sünain nümüin: «Jesuu, anii taya antüin». Jee nüchuʼlaka nuwalapaʼa. «Judas, paapa ekiichi taya süka püchuʼlüin tawalapaʼa», nümaka Jesuu nümüin.

Nürütkaaka Jesuu nanainmüin na wayuu antakana. «¿Jarai jüchajaaka achiki?», nümaka namüin. «Nia Jesuu chi Nazaretjeʼewaikai», namaka na wayuukana. Nusoutaka Jesuu: «Taya tayakai». Wanaa sümaa nümüin Jesuu tia namüin, ansünajaashii sünain noʼnnajaain. Nüsakiraka Jesuu naya nachikuaʼa: «¿Jarai jüchajaakai achiki?». Nasoutaka nümüin: «Nia Jesuu chi Nazaretjeʼewaikai». Nümaka Jesuu: «Tamüinnapa jia sünain tayain tayakai. Müleka tayale jüchajaain achiki, juuʼulaa noʼunaiwa na wayuu yaakana tamaa».

Jee müshia Pedro, nuwataaka nooʼomüin wanee nüchepchia chi laülaashikai napüleerua na sacerdootekana. Nüchotooko tü nücheʼekat süka wanee chajaruuta. Malco nünülia chia achepchieekai. Niʼitaaka najapü Jesuu saaʼu nücheʼe chia wayuukai, anaka nia nutuma. «Pünaajaa püchajaruutse, pütkaale süka tü chajaruutakat, oukteechi neʼe pia  süka chajaruuta», nümaka Jesuu nümüin Pedro. Amaanüshi Jesuu natuma na surulaatkana sümaa kapüin najapü. Naʼluwataaka na aluwataaushiikana wanaa sümaa tia. Jee tü wayuukalüirua suʼunirüin Jesuu nümaʼanamüin Anás chi laülaashikai napüleerua na sacerdootekana. Asakinnüshi jooluʼu Jesuu nutuma Anás, niʼikajeʼeraka joo Jesuu nümaʼanamüin Caifás chi wanee laülaashikai napüleerua na sacerdootekana. ¿Kasaka alatüin namüin mapa na aluwataaushiikana?