Sülatapa maʼaka jeʼra kaʼi süchikijee niiʼiyataain Jesuu namüin na aluwataaushiikana, oʼunushi Pedro sünain olojoo jime shiroku tü palaa kanüliakat Galilea. Eejachi Tomás nümaa, Santiago, Juan otta waneinnua nikirajüin Jesuu. Siraasü aika naaʼu sümaa masirüin naya.

Jaʼyuupa naaʼu, neʼrüin wanee wayuu sotpaʼa tü palaakat. «¿Kasitshii jia?», nümaka chi wayuukai namüin wattajee. «Nnojo», namaka nümüin. «Anasü jujutule tü jukusuinkat süchikuaʼa yalamüin yala», nümaka joo chi wayuukai namüin. Nojutaka tü nakusüinkat shirokumüin tü palaakat, kasitka naya jime watta maʼin saalii. Isasü nachiki nayuʼluin süka jawatüin shia noulia. Niasaʼa joo Juan niyaawataka naaʼu sünain niain Jesuu chi wayuu neʼrakai. «Niaʼayaa chi Senyotkai», nümaka. Numuttaka Pedro shirokumüin tü palaakat süpüla oʼunaa eemüin Jesuu. Noʼunaka na waneinnua suluʼu tü anuwakat sotpaʼamüin tü palaakat.

Nashakatapa suluʼujee tü anuwakat, eesü napüla wanee siki asijüna aaʼulu jime otta pan. «Icheʼera jümaala süpüshi tü jüsitkat süsijaanaiwa», nümaka Jesuu namüin. «Jalainna jikaiwa», nümaka.

 «¿Alatüsü taalin püpüla suulia jimekat tüüirua?», nümaka Jesuu nümüin Pedro keraapa naya sünain ekawaa. «Senyotkalee, pütüjaa aaʼu sümaa alin pia tapüla», nümaka Pedro. «Pikajira maa tamüin taʼanneetse», nümaka Jesuu nümüin. Nüsakinnaka Pedro nüchikuaʼa nutuma Jesuu: «¿Shiimain sünain alin taya püpüla?». Nusoutaka Pedro nümüin: «Senyotkalee, shiimainya pütüjaain aaʼu sümaa alin pia tapüla». «Pürüleeja maa tamüin taʼanneetse», nümaka Jesuu. Apünüintua nüsakinnüin Pedro nutuma Jesuu sünain tia. Mojuka naaʼin Pedro sutuma nüsakinnüin nüchikuaʼa. «Senyotkalee, pütüjaa aaʼu kasakat süpüshuaʼa. Pütüjaa aaʼuchi alin pia tapüla», nümaka Pedro nümüin. Nusoutaka Jesuu nümüin: «Anashii pikajirüle na taʼanneetsekana. Ayata pia waneepia puushikaain süchiirua takuwaʼipa».