Chaʼayaa Cesarea, eejachi wanee wayuu roomajeʼewai sülaüla surulaat, Cornelio nünülia. Wayuu kojutushi nia sümüin tü judíokalüirua mayaainjeʼe nnojoluin judíoin nia. Wayuu kamaneeshi nia jee watta saalii kasa anasü naaʼinraka napüleerua na müliakana aaʼin. Kanoulashi Cornelio nünain Jeʼwaa otta oʼuraajawaishi nia waneepia. Soʼu wanee kaʼi, eeʼiyataashi wanee aapiee nümüin sünain nümüin nümüin: «Naapüinya pünüiki chi Maleiwakai. Püjüta wanee püchepchia Jopemüin nasaajaiwa Pedro pümüin». Nuluwataamaataka Cornelio apünüinshii wayuu. Tia pueulokot eetaasü maʼaka 50 kiloometüro oʼunushi uuchimüin.

Wanaa sümaa nuluwataain Cornelio na wayuukana, süntaka nünainmüin Pedro wanee kasa müsü aka saaʼin lapü. Niʼrüin Pedro tü mürüt apülajünakat suulia neküin na judíokana. Naapaka Pedro wanee pütchi makat: «Pikapan». Niyoutaka niküin tia. «Nnojotyülia teküin wanee mürüt nüpülajaka woulia chi Maleiwakai», nümaka. Nümünaka nüchikuaʼa: «Nnojo müin pünüiki sünain mojuin süpüla ekünaa tia mürütkalüirua. Eeitpa süpüla ekünaa naashin chi Maleiwakai. Eeshii apünüinshii wayuu yalakana soʼuluʼu tü puettoʼukot, puʼuna namaa». Nujutatka Pedro tü puettoʼukot jee nüsakirüin naya wayuukana jaralin kaluwataalain naya. «Nuluwataala waya Cornelio, chi laülaakai saaʼu surulaat romaano. Anashi puʼunüle wamaa nipialuʼumüin naashin, Cesareamüin», namaka na wayuukana nümüin Pedro. «Makata jia soʼu aikat tüü», nümaka  Pedro namüin. Nuʼunaka namaa wattaʼa mapa Cesareamüin. Eejana waneinnua anoujashii yalajanakana kepiain Jope oʼunakana nümaa.

Nüsapainkaka Cornelio nümülatuʼu Pedro niʼrapa nüntüin. «¡Pütamaa! ¡Wayuʼuya neʼe taya wanaa pümaa! Nüküjüin tamüin chi Maleiwakai tantajachin pipialuʼumüin, mayaainjeʼe jütüjaain aaʼu na judíokana nnojoliinjanain nanainpünaain na gentiilekana. Jee jooluʼu, tatüjawee aaʼulu sünain kasain jüsaajirüin apüla taya», nümaka Pedro nümüin.

«Pienchirü kaʼi alataka süchikijee toʼuraajüin nümüin Maleiwa, nüküjaka tamüin wanee aapiee tasaajirüinjachin pia. Pikiraja maa waya sünain süpüshuaʼa tü nüchikimaajatkat Jeʼwaa», nümakalaka Cornelio nümüin Pedro süchiki tü alatakat. «Tayaawatüitpa aaʼu sünain shiimain nnojoluin koʼuin nukuwaʼipa Maleiwa sümüin wayuu. Nücheküin chi wayuu eekai keeʼireein naaʼin nuʼwaajüin nia», nümaka Pedro. Nikirajaka naya Pedro sünain tü kasa nüchikimaajatkat Jesuu. Süchikijee tia, antüshi chi naaʼinkai Maleiwa naaʼu Cornelio namaa na yalajanakana jutkatüin nümaa. Woutiisaka naya.