Süʼütpaʼa Babel, eejatü wanee pueulo kanüliasü Ur. Na wayuu kepiakana yala, nnojoishi naʼwaajüin Jeʼwaa, naʼwaajüin waneirua maleiwayaasü. Eejaipajaʼa wanee wayuu aʼwaajaka Jeʼwaa. Abraham nünülia.

Müshi Jeʼwaa nümüin Abraham: «Anakajaʼa puʼunüle suluʼujee tü mmakat eere kepiain pia otta püpüta püpüshi. Puʼuna eemüin wanee mma teeʼiyatüinjatka pümüin». Nüpansaaka nünüiki nümüin, nümaka: «Watteerü saalin tü puuʼuliwoʼukalüirua. Sünainjee tü kasa anasü taaʼinreetkat püka, anakuwaʼipaleerü wayuu wainmayaa».

Nnojotsü nütüjaain aaʼu Abraham jalainjachin nia aluwataanüin nutuma Jeʼwaa, niʼitaapejeʼe naaʼin nünain. Jaa müshi Abraham sümaa Sara nümüin Maleiwa, akaʼaya Taré, chi nüshikai otta Lot chi nüsiipükai. Yapaja müsia natuma nachise süpüla oʼunaa jee oʼunaajaa namüin yalejee.

 Wanaa sümaa nüntüin Abraham suluʼumüin tü mma niiʼiyatakat Jeʼwaa nümüin 75 nuuyase. Canaán sünülia tia mmakat. Müsü nünüiki Jeʼwaa nümüin Abraham chayaa: «Süpüshuaʼa mmakat tüü, taapeerü shia namüin na puuʼuliwoʼukana». Akaisaʼa Abraham sümaa Sara laülaaina sümaa machoin naya. ¿Kaseetche naaʼinraka Jeʼwaa süpüla nikeraajüin nünüiki?