Nüküjain Moisés nümüin faraón nnojoluinjachin nüleʼejüin nüchikuaʼa. Apütaashi nia süka pütchikat tüü: «Soʼu kaʼikat tüü, süseʼeruʼupünaa aikat, outajana neʼiruma na egipciokana. Outajachi niʼiruma faraón jee shiʼiruma wayuu eekai achepchieein».

Nümaka Jeʼwaa namüin na israeliitakana: «Eeinjatü wanee ekawaa jutuma, juʼutuinjachi naaʼin wanee anneetchon jee niale wanee kaaʼulachon eekai waneeichin juya. Jushulejüinjatü nüsha sotpünaa soʼu tü jipiakat, jüsijaa tü asalaakat jikaiwa shia sümaa pan maʼakasat soolojia. Yapaja jia, jaʼata jüsheʼin otta jüsapaatse juʼunaiwa Egiptojee. Taasheena jia tatuma soʼu aikat tüü». Talatakajasaʼa maʼin naaʼin na israeliitakana, ¿aashimüin?

Süseʼeruʼupünaa aika, antüshi Egiptomüin chi aapiee nümaʼanajeejachikai Jeʼwaa. Nuʼutakalaka naaʼin neʼiruma na wayuu nnojoliikana ashulejüin isha sünain sotpünaa soʼu nepia. Nnojoliipajaʼa jamajüin neʼiruma na wayuu ashulejakana isha sünain sotpünaa soʼu nepia. Nnojoishii outuin nachonnii na israeliitakana.

Outushi niʼiruma faraón. Jashichishaatashi maʼin nia sünainjee tia. Nümakalaka nümüin Moisés: «¡Juʼuna yaajee! ¡Juʼuna, juʼwaajai chi Jümaleiwasekai, jümaa tü mürütkalüirua, juʼunaata jümaala!».

Siraasü kashikat soʼu aikat tia. Kottüshii napüshuaʼa na israeliitakana wanaa sümaa noʼunuin Egiptojee. Eejana maʼaka 600.000 tooloyuu ojuʼitaka Egiptojee jee müsia watta  saalii jieyuu otta tepichi. Watta naalii na nnojoliikana israeliitain, na oʼunakana namaa süpüla naʼwaajüinjachin Jeʼwaa. ¡Nnojoliinnapa achepchieein na israeliitakana soʼu kaʼikat tia!

Süpüla sotuinjatüin naaʼin tü naaʼinrakat Jeʼwaa napüleerua wanaa sümaa nojuʼituin Egiptojee, naaʼinrüinjatü juyawai wanee ekawaa. Pascua sünülia tia natuma.