Sülatapa kojuya juya chaiwaʼaya na israeliitakana isashiipaʼa, eʼrüijaashi wayumüin Coré nümüin Moisés, akaʼaya Datán, Abiram otta na 250 wayuu namaajanakana. Anuu nanüiki nümüin Moisés: «¡Akulajaaitpa waaʼin jümaa! ¿Jamüshi pülanaweeka waaʼu sünain aluwatawaa? ¿Jamüshi niainjachika Aarón laülaain napüleerua na sacerdootekana? Nnojoishi eein neʼe Jeʼwaa pümaa piakai otta nümaa Aarón, eeshi nia wamaʼaya». Mojushiisü nümüin Jeʼwaa tü namakat otta eʼrüijaashii naya wayumüin nümüin.

«Jünta wattaʼa eemüin tü piichi aʼwaajüleekat jee jülüʼüja tü aʼajiakat sümaa tü wunuʼu jemetakat eejuu. Watüjaajeechika aaʼu jaralin nüneeküin Jeʼwaa», nümaka Moisés nümüin Coré otta na nümaajanakana.

Shiasaʼa waneemüin kaʼi, outkajaashi Moisés suluʼu tü piichi aʼwaajüleekat nümaa Coré otta na 250 wayuu nümaajanakana; naʼajaka tü wunuʼu jemetakat eejuu. Tia naaʼinrajatü neʼe na sacerdootekana. «Jükatalaa nuulia Coré otta noulia na wayuu nümaajanakana», nümaka Jeʼwaa nümüin Moisés otta Aarón.

Nnojoishi chajachin Datán, Abiram otta na napüshikana suluʼu tü piichi aʼwaajüleekat. «Wattaluʼu jia suulia nipia Coré, Datán otta Abiram», nümaka Jeʼwaa namüin na israeliitakana. Naaʼinramaatüin tia  na israeliitakana. Yalajachi shaʼwatüin Datán, Abiram otta na napüshikana süʼütpaʼa nepia. Suwakajaaka tü mmakat, shimiratka naya saaliijee neʼrüliin wayumüin. Shiasaʼa chaa suluʼu tü piichi aʼwaajüleekat, achuwajaasü siki iipünaajee jee jotoka Coré otta na 250 wayuu nümaajanakana.

Nümaka Jeʼwaa nümüin Moisés: «Püma namüin na laülaakana saaʼu tü poloosükat eʼirukuu nantiraaiwa nawaraaratse. Püshaja nanülia naya laülaashiikana waneʼewai sukua sünain nawaraaratse. Püshajüinjatpajaʼa nünülia Aarón sünain tü waraarat sümüinkat niʼiruku Leví. Piʼitaa süpüshuaʼa suluʼu tü piichi aʼwaajüleekat. Niasaʼa chi wayuu taneeküinjachikai, awüʼiraajeerü nuwaraaratse».

Waneemüin kaʼi, nüsaajüin Moisés nawaraaratse na laülaashiikana sümaa niiʼiyatüin shia namüin. Tü nuwaraaratsekat Aarón awüʼiraasü jee eejatü Almendra sünain. Atüjaanüichipa aaʼu niain Aarón aneekünüin nutuma Jeʼwaa süpüla laülaainjachin napüleerua na sacerdootekana.